Најголемата опозициска партија во Косово, Движењето Самоопределување (ВВ), им честита на Албанците во Северна Македонија за исходот на вчерашните вонредни парламентарни избори, оценувајќи дека бројката од 32 до 34 пратеници е најдобриот резултат што Албанците го постигнале од осамостојувањето на државата. Од партијата на Албин Курти сметаат дека и тие имаат заслуги за исходот од изборите.
„Додека се уште ги чекаме конечните резултати, добрата вест е дека според резултатите кои ги пренесува Државната изборна комисија, во македонското Собрание ќе седат меѓу 32 и 34 пратеници Албанци. Тоа е и своевиен рекорд, затоа што претходната најголема бројка на пратеници Албанци изнесуваше 29. Влијаеше, меѓу другото, и залагањето на Движењето самоопределување, кое го поттикна големото учество на Албанците на овие избори“
пишува во соопштението на Самопределување.
Од партијата го повторуваат ставот дека наскоро планираат да се легитимираат како политички субјект во Северна Македонија.
„Самоопределување наскоро ќе отвори свој центар во Северна Македонија. Заедно ќе се залагаме и ќе се организираме, отворени за пријателство со секој искрен пријател, со цел позитивните и прогресивни процеси да се забрзаат, а оние негативните, дискриминирачки и назадни да се запрат. Албанците ќе бидат решавачки елемент за победникот на изборите, но и за формирањето на владата во Северна Македонија“
се вели во соопштението.