Министерот апелираше до хронично болните да се вакцинираат со четврта доза доколку веќе примиле трета, а до лицата кои се тестираат дома со брзи тестови побара да се самоизолираат најмалку три дена. Моменталната состојба во болниците тој рече дека е стабилна
Ако се гледа според искуството на досегашните бранови на зараза со ковид-19, сега се наоѓаме пред пикот на моменталниот бран, изјави денеска министерот за здравство Беким Сали.
„Засега според динамиката во која се движиме како општество нема загрижувачки бројки, меѓутоа да напоменам дека е период на зголемено движење во туризмот односно наши граѓани одат во странство и странци доаѓаат кај нас. Овие зголемени прекугранични движења се ризик сами по себе за ширење односно зголемување на бројот на новоинфицирани. Од искуството на четирите брана досега, кои траеле секој по осум недели, ние сега сме веќе во третата недела и идната ќе бидеме во четвртата што би требало да подразбира дека сме пред пикот на новоинфицирани, но со ковидот никогаш не сме на сигурно“,
рече Сали.
Во моментов заседава и Комисијата за заразни болести, а дали ќе се предложат некои дополнителни мерки или не, како што рече министерот, ќе се знае по завршување на состанокот.
Тој апелираше до хронично болните да се вакцинираат со четврта доза доколку веќе примиле трета, а до лицата кои се тестираат дома со брзи тестови побара да се самоизолираат најмалку три дена.
Моменталната состојба во болниците тој рече дека е стабилна односно системот не е оптоварен. Хоспитализирани се помалку од сто пациенти во сите инфективни клиники во државата и моментално, како што рече, сме во жолта фаза.
Министерот посочи дека Скопје е во црвена фаза поради големиот број на новоинфицирани, а не поради оптовареност на системот.