Таа како успех на бугарската надворешна политика ја истакнала одбраната на бугарската позиција за вклучување на Бугарите во Уставот на Република Северна Македонија
Сакаме гаранции за правата на македонските Бугари и почитување на историјата, изјавила бугарската потпретседателка Илијана Јотова за време на учеството на политичката школа „Димитар Паница“, јавува дописникот на МИА од Софија.
„Сакаме гаранции за правата на македонските Бугари, за вистинско добрососедство, почитување на историјата“,
рекла Јотова и нагласила дека секој што сака да биде дел од европското семејство мора да разбере дека тоа не е ниту банка ниту донатор, туку слобода и заштита на човековите права.
Таа како успех на бугарската надворешна политика ја истакнала одбраната на бугарската позиција за вклучување на Бугарите во Уставот на Република Северна Македонија.
„Ова е пример како може да се постигне успех кога се работи со сите институции и политички партии во Бугарија“,
потенцирала Јотова.
Потпретседателката на Бугарија изјавила дека главен аспект на бугарската и европската надворешна политика е проширувањето на Европската Унија, а особено европската перспектива на Република Северна Македонија и нејзините односи со Бугарија
Според Јотова, проширувањето на ЕУ кон Западен Балкан влијае и на уште едно големо прашање – Босна и Херцеговина, Србија, Косово. Овој јазол, според потпретседателката на Бугарија, може да се одврзе само со јасна перспектива за овие земји, а сигналот мора да дојде токму од ЕУ, во спротивно тие секогаш би останале точки на конфликт.
Таа смета дека е потребно силно лидерство меѓу европските политичари и посочила дека надворешната политика е тесно поврзана со безбедносната политика, а ја потенцирала и темата за миграциската политика на ЕУ, за која веќе осум години не може да најде соодветно решение.
Јотова истакнала и дека надворешната политика отсуствува од јавната дебата, односно меѓу водечките теми во изборната кампања во Бугарија и нагласила дека земјата често страдала од странски одлуки и не се обидела да биде целосен дел од европскиот и глобалниот процес на одлучување.