„Понатамошното усогласување со Русија е чекор во погрешна насока и е во спротивност со изразените европски аспирации на Србија. Србија треба да ги забрза чекорите за напредување на европскиот пат, вклучително и диверзификација на изворите на енергија за намалување на енергетската зависност од Русија и усогласување на надворешната и безбедносната политика со Европската Унија“, соопштија од Стејт департментот
Ниту една земја не треба да ја проширува соработката со Русија додека таа ја продолжува својата агресија врз Украина, објави американскиот Стејт департмент во врска со одлуката на Министерството за надворешни работи на Србија да потпише план за консултации со руското Министерство за следните две години, пишува српски Глас на Америка.
Документот беше потпишан минатата недела, за време на Генералното собрание на ОН во Њујорк, од шефот на српската дипломатија Никола Селаковиќ и рускиот министер за надворешни работи Сергеј Лавров.
Селаковиќ тогаш кажа дека тоа е технички документ кој е потпишан од 1996 година и дека содржи изјави поврзани со Косово и надворешната политика, a дека во него нема елементи на безбедносна политика.
Портпаролот на Стејт департментот во изјава за Гласот на Америка синоќа изјави дека вестите за договорот се изненадувачки и во целосна спротивност со другите конструктивни средби што се одржале со српските претставници во Њујорк. Во одговорот не е прецизирано за кои средби станува збор.
Претседателот на Србија, Александар Вучиќ, во Њујорк разговараше, меѓу другите, со советникот за национална безбедност на Белата куќа Џејк Саливан и со потсекретарот за политички прашања Викторија Нуланд.
„Понатамошното усогласување со Русија е чекор во погрешна насока и е во спротивност со изразените европски аспирации на Србија. Србија треба да ги забрза чекорите за напредување на европскиот пат, вклучително и диверзификација на изворите на енергија за намалување на енергетската зависност од Русија и усогласување на надворешната и безбедносната политика со Европската Унија“,
соопштија од Стејт департментот.
Меѓу другото, Стејт департментот рече дека САД продолжуваат силно да ја поддржуваат целта на Србија да стане членка на ЕУ.
„Јасно е дека Русија не го поддржува пристапувањето на земјите од Западен Балкан во Европската Унија и само се обидува да предизвика поделби во регионот. Иднината на Западен Балкан е недвосмислено во ЕУ; проширувањето промовира долгорочен мир, стабилност и просперитет во целиот регион“,
се заклучува во одговорот.
Европскиот парламент (ЕП) вчера изјави дека ќе побара од Европската Унија (ЕУ) да ги прекине пристапните преговори со Србија доколку таа не воведе санкции против Русија, се наведува во нацртот за новата стратегија на ЕУ во која редакцијата на Радио Слободна Европа (РСЕ) имала увид.
За ова пратениците на ЕП ќе расправаат во Комисијата за надворешна политика на 13 октомври, а конечната верзија на нацрт-извештајот ќе биде усвоена во форма на резолуција на ЕП на гласање кое се очекува да се одржи во текот на ноември.