Американскиот секретар за одбрана Лојд Остин соопшти дека присуството на носачот на авиони УСС „Ајзенхауер“ и неговите придружни воени бродови во источниот Медитеран е сигнал за „железната посветеност на Вашингтон за безбедноста на Израел“ и решеноста на САД да го „одврати секој државен или недржавен актер кој сака оваа војна да ескалира“
Соединетите Американски Држави (САД) ќе распоредат втор носач на авиони во Средоземното Море со цел да се спречи, како што се наведува, ескалација на војната меѓу Израел и Хамас пошироко во регионот, а во пресрет на најавената офанзива на израелската војска (ИДФ) на Појасот Газа, објави британски „Гардијан“.
Американскиот секретар за одбрана Лојд Остин соопшти дека присуството на носачот на авиони УСС „Ајзенхауер“ и неговите придружни воени бродови во источниот Медитеран е сигнал за „железната посветеност на Вашингтон за безбедноста на Израел“ и решеноста на САД да го „одврати секој државен или недржавен актер кој сака оваа војна да ескалира“.
Носачот на авиони „Ајзенхауер“ ќе му се приклучи на носачот УСС „Џералд Форд“, кој претходно неделава беше распореден во источниот Медитеран, како дел од напорите на Вашингтон за одвраќање на какви било непријателски дејствија против Израел или какви било обиди за проширување на војната по нападот Хамас на израелската територија пред точно една недела, рече Остин.
Рано утринава, пак, мисијата на Иран во Обединетите нации предупреди на „далекусежни последици“ доколку „воените злосторства и геноцидот“ на Израел во Појасот Газа не бидат веднаш запрени.
„Одговорноста е на ОН, Советот за безбедност и државите кои го водат советот кон ќорсокак“,
соопшти мисијата на Иран во ОН.
Израелската војска вчера попладне објави дека се подготувува за сеопфатна офанзива на Појасот Газа, во која ќе бидат вклучени воздушни, копнени и поморски сили.
Израелскиот премиер Бенјамин Нетанјаху се сретна со воените претставници во јужниот дел на земјата и им се обрати на мобилизираните војници, посочувајќи дека „следи нова фаза“ во војната со Хамас.
Пред два дена израелската војска издаде наредба за евакуација од северниот кон јужниот дел на енклавата, а во пресрет на најавената офанзива.
Можностите за 2,3 милиони жители на Газа да најдат сигурно засолниште се ограничени, пишува „Гардијан“, бидејќи се соочуваат со недостаток на храна, вода, гориво и медицински материјали, како и со застрашувачка ескалација на крвопролевањето, доколку борбите се интензивираат.
Некои стравуваат дека ќе бидат убиени на патот додека бегаат на југ. Цивилен конвој за евакуација завчера беше погоден од ракета, при што загинаа 70 лица, вклучувајќи жени и деца.
СЗО: Наредбата за евакуација на болниците во Газа е еднаква на смртна казна
Светската здравствена организација (СЗО) ја осуди наредбата на Израел за евакуација на 22 болници во северниот дел на Газа, во кои се лекуваат повеќе од 2 000 пациенти. Организацијата соопшти дека евакуацијата „може да биде еднаква на смртна казна“ за пациентите, меѓу кои има и новороденчиња во инкубатори и луѓе на интензивна нега.
Потсекретарот на ОН за хуманитарни прашања и координатор за итна помош, Мартин Грифитс, предупреди дека хуманитарната ситуација во Газа „брзо станува неодржлива“.
Директивата за евакуација опфаќа околу 1,1 милион жители, или речиси половина од населението на територијата на Газа. Израелската војска соопшти дека „стотици илјади“ Палестинци досега се упатиле кон југ. Таа им даде на Палестинците шестчасовен прозорец за безбедно патување кон југот на Газа по две главни рути, рок кој заврши вчера попладне.
Лидерот на Хамас, Исмаил Ханије, вчера во телевизиско обраќање рече дека „нема да има миграција од Газа во Египет“ по наредбата на Израел за евакуација. Тој во Доха, Катар, се состана со иранскиот министер за надворешни работи Хосеин Амир Абдолахиан, при што рече дека двајцата се согласиле да ја продолжат соработката за да ги постигнат целите на Хамас.
Ненадејниот напад на Хамас пред една недела во кој брутално беа убиени повеќе од 1 300 Израелци, предизвика еднонеделни смртоносни израелски воздушни напади врз Газа. Здравствените власти во енклавата соопштија дека во воените дејствија на Израел што уследија како одговор на нападот се убиени 2 329 Палестинци, а 9 714 се повредени. Како и на израелската страна, повеќето од нив се цивили.
Во меѓувреме, летови со помош за Газа пристигнуваат на египетскиот полуостров Синај, додека траат дипломатските напори да се отворат хуманитарни коридори во енклавата.
САД бараат договор за воспоставување безбедни зони
Американскиот државен секретар Ентони Блинкен за време на турнејата низ регионот рече дека САД бараат договор за воспоставување рути за помош и безбедни зони. Но, до вчера вечерта сè уште немаше никаков договор.
Инаку, Египет го контролира граничниот премин „Рафа“ во Газа, но според договорот меѓу Израел и Египет, откако Хамас ја презеде целосната контрола врз Газа во 2007 година, за секоја помош која влегува од југ, потребно е одобрение од Израел.
Американскиот претседател Џо Бајден вчера телефонски разговараше со израелскиот премиер Бенјамин Нетанјаху, во која го повторил ставот на Вашингтон за потребата од заштита на цивилите, се наведува во соопштението на Белата куќа, во кое, како што пренесуваат агенциите, не се споменува Газа.
„Претседателот Бајден разговараше со премиерот Нетанјаху за координацијата на САД со Обединетите нации, Египет, Јордан, Израел и другите земји во регионот за да се осигура невините цивили да имаат пристап до вода, храна и медицинска нега“,
соопшти Белата куќа.
Бајден, исто така, разговараше и со лидерот на палестинската управа, претседателот Махмуд Абас, првпат по избувнувањето на непријателствата пред една недела. Тој во разговорот го осуди бруталниот напад на Хамас врз Израел.
„Хамас не се залага за правото на палестинскиот народ на достоинство и самоопределување“, му рекол Бајден на Абас“,
се вели во соопштението на Белата куќа.
Бајден во разговорот, исто така, ветил „целосна поддршка“ на палестинската управа во нејзините напори да им се обезбеди хуманитарна помош на Палестинците, „особено во Газа“, се вели во соопштението.