Палестинското Министерство за здравство го обвини Израел за нападот на конвојот додека, пак, израелските одбранбени сили соопштија дека го истражуваат инцидентот, истовремено обвинувајќи го Хамас дека се обидува да ја спречи евакуацијата на палестинските цивили од северниот дел на Појасот Газа
Повеќе лица загинаа во воздушен напад на конвој возила за евакуација од северниот кон јужниот дел на Газа, пренесуваат светските медиуми.
На видеоснимка, верификувана од Би-би-си и чија грозоморна содржина ја пренесува британскиот национален сервис, се гледале телата на најмалку 12 мртви луѓе, главно жени и деца, од кои некои, според проценките, се на возраст од две до пет години.
Британскиот јавен сервис јавува дека ударот на конвојот се случил на улицата Салах ал-Дин, најверојатно околу 17:30 часот по локално време, а повеќето тела биле пронајдени во задниот дел на камион со рамно лежиште, додека други лежеле на патот.
Палестинското Министерство за здравство соопшти дека биле убиени 70 луѓе, кои од повредите починале на самото место и за нападот го обвини Израел.
Израелските одбранбени сили (ИДФ), пак, соопштија дека го истражуваат инцидентот и го обвинија Хамас дека се обидува да ги спречи палестинските цивили да се придржуваат до наредбата што вчера ја издаде Израел и да го напуштат северот на Појасот Газа.
Голем број луѓе тргнаа на патот наменет за евакуација уште од моментот кога Израел го предупреди населението да се засолни пред можната копнена офанзива на израелската војска на Појасот Газа.
Од израелската војска соопштија дека постапуваат согласно со меѓународното право, по обвинувањата дека евакуацијата на луѓето од северниот дел на Газа претставува воено злосторство.
„Ние не ставаме луѓе во камиони. Им велиме да се преселат на југ. Хамас може да ги премести ако се грижи за нив, тоа е негова одговорност“,
изјави за Би-би-си потполковник Ричард Хехт, портпарол на израелските одбранбени сили (ИДФ).
Британскиот јавен сервис објави дека израелската армија предложила цивилите кои бегаат од Газа да останат кај роднините или да користат шатори како место за престој.
Израелската армија денеска му препорача на населението во градот Газа да не губи време и да ја забрза евакуацијата.
Луѓето беа повикани да ги напуштат своите домови и да се упатат кон јужниот дел на Појасот Газа пред да започне копнената офанзива, а патиштата кон север се веќе блокирани.
Портпаролот на ИДФ, Ричард Хехт, соопшти дека денеска од 10 до 16 часот цивилите може да го напуштат северниот дел на палестинската енклава.
„Знаеме дека ќе биде потребно време, но препорачуваме луѓето да не чекаат“,
додаде тој.
Илјадници локални жители и денеска се качија во автобуси, автомобили и коли влечени од магариња за да избегаат од областа. Вооружената група Хамас, која владее со Појасот Газа од 2007 година, го отфрли повикот за евакуација.
„Нашиот палестински народ ја отфрла заканата на окупаторското раководство и неговите повици да ги напуштиме домовите и да побегнеме на југ или во Египет“,
соопшти вчера Хамас.