Милитантите на Хамас точно пред една недела ненадејно влегоа на територијата на Израел истовремено истрелувајќи, како што тврдеа, 5 000 ракети, а во серијата напади беа убиени повеќе од 1 300 луѓе, главно цивили. Во одговорот на Израел, според синоќешните податоци, досега се убиени над 1 900 Палестинци
Продолжен е рокот за евакуација од Појасот Газа, каде што Израел планира да ги интензивира борбите – со цел, како што синоќа повтори премиерот Бенјамин Нетанјаху, „да го избрише Хамас од лицето на земјата“. Израелската војска нема да напаѓа денеска од 10 до 14 часот по локално време.
Во текот на вчерашниот ден Хамас испраќаше пораки до жителите на Газа да не се евакуираат тврдејќи дека Израел се обидува да го „елиминира домородното население од својата земја“.
Обединетите нации се само една од организациите кои изразија загриженост дека Палестинците од северот на Газа сега можат да се преселат само на југ од територијата, која и онака е густо населена.
Целосната блокада на Газа сè уште е во сила, а Израел вели дека снабдувањето со електрична енергија, вода и стоки ќе продолжи откако Хамас ќе ги врати околу 150-те заложници што ги однесе во Газа.
Израел вчера размени оган со Либан, при што еден новинар загина, а шестмина беа ранети.
Портпаролот на израелската војска објави дека израелските воздухопловни сили убиле висок воен функционер на палестинскиот исламистички Хамас.
„За време на операцијата на воздухопловните сили во последните 24 часа беа погодени командните бази на терористичката организација Хамас. За време на таа операција, убиен е Мурад Абу Мурад, шефот на воздушните операции (на Хамас) во градот Газа, одговорен за голем дел од смртоносната офанзива започната во саботата против Израел“,
се вели во соопштението на портпаролот.
Милитантите на Хамас точно пред една недела ненадејно влегоа на територијата на Израел истовремено истрелувајќи, како што тврдеа, 5 000 ракети, а во серијата напади беа убиени повеќе од 1 300 луѓе, главно цивили. Во одговорот на Израел, според синоќешните податоци, досега се убиени над 1 900 Палестинци.