Тим од десет меѓународни научници на СЗО од средината на јануари се во кинескиот град Вухан, кои денеска излегоа од задолжителниот карантин по што ќе ја почнат истрагата
Јасна и темелна истрага која ќе ја открие суштината на појавата на пандемијата со коронавирусот во Кина, побара портпаролката на Белата куќа, Џен Псаки, пред почетокот на теренската истрага од страна на експертите на Светската здравствена организација (СЗО).
Според неа, Вашингтон ќе ја процени веродостојноста на извештајот за истрагата кога ќе биде завршен и ќе користи „информации што биле собрани и анализирани од американските разузнавачки служби“ на оваа тема.
Тим од десет меѓународни научници на СЗО од средината на јануари се во кинескиот град Вухан.
По периодот на карантин, кој завршува денеска, научниците ќе започнат истрага за потеклото на коронавирусот, кој првпат се појави во Вухан, а алармот за првиот случај беше вклучен пред една година.
Мисијата е под политички притисок бидејќи Кина се обидува да избегне обвинување за наводни грешки во одговорот на почетокот на пандемијата.
Главното прашање е каде кинеските власти ќе им овозможат на истражувачите да одат и со кого ќе можат да разговараат.
Независната експертска група за подготвеност и одговор на пандемијата со седиште во Швајцарија во вториот нацрт-извештај објавен пред десетина дена, констатира дека Кина и СЗО не дејствувале навремено за да го спречат ширењето.