Независната експертска група за подготвеност и одговор на пандемијата со седиште во Швајцарија, грешката на Пекинг ја лоцира во задоцнетото пријавување на случаите во Вухан, а СЗО смета дека има ограничена моќ во проценка на опсегот на епидемиите
Кина и Светската здравствена организација (СЗО) можеа да дејствуваат побрзо и поодлучно за да ја спречат епидемијата со ковид-19, оцени независната работна група во својот втор нацрт- извештај.
Независната експертска група за подготвеност и одговор на пандемијата со седиште во Швајцарија утврди дека Пекинг можел да биде поинтензивен во примената на мерките за јавно здравје кога случаите биле откриени во градот Вухан, во провинцијата Хубеј.
„Она што заклучи групата е дека локалните и националните здравствени власти во Кина во јануари (2020 година) можеле да применат поостри мерки за јавно здравје“,
се вели во извештајот.
Според градските власти, првите случаи во Вухан се откриени меѓу 12 и 29 декември 2019 година, но тие не биле пријавени во СЗО до 31 декември. До моментот кога Вухан е ставен под блокада на 23 јануари 2020 година, вирусот веќе се проширил во Јапонија, Јужна Кореја, Тајланд и САД. Неколку земји, меѓу кои најгласни беа САД и Австралија, го обвинија Пекинг дека ја минимизира сериозноста на епидемијата во раните фази и спречува ефикана реакција се’ додека не стане предоцна.
Што чекаше СЗО?
Независниот панел, со кој ко-претседава поранешната премиерка на Нов Зеланд, Хелен Кларк и поранешната претседателка на Либерија, Елен Џонсон Сирлиф, исто така ја критикуваат и СЗО за задоцнето вклучување на алармот и бара реформи во агенцијата на ООН.
„И покрај тоа што беа предупредени за случаите до крајот на декември 2019 година, СЗО не го свика својот комитет за итни случаи до 22 јануари 2020 година – а потоа чекаше до 30 јануари пред да прогласи меѓународна вонредна состојба. Не е јасно зошто комитетот се состана дури третата недела од јануари, ниту е јасно зошто не беше во можност да се договори прогласување пандемија“,
се вели во извештајот.
Извештајот, исто така, потенцираше дека СЗО не прогласи пандемијата до 11 март 2020 година, дури откако некои здравствени експерти и медиуми веќе започнаа да го користат терминот. Во тоа време, во светот веќе имало 118 000 случаи и повеќе од 4 000 смртни случаи.
„Иако терминот пандемија не е ниту употребен ниту дефиниран во Меѓународните здравствени регулативи (2005 година), неговата употреба навистина служи за фокусирање на тежината на здравствениот настан“,
се вели во извештајот.
Притоа, се заклучува дека СЗО „е обврзана да ја заврши работата што се очекуваше од неа“, но се соочила со „сериозно ограничена“ моќ да ги потврди извештаите за епидемии со пандемски потенцијал или да распореди поддршка за локалните области, се вели во извештајот.
Независната група смета дека меѓународната заедница треба да направи „глобално ресетирање“ за тоа како се справува со пандемиите.
Финалниот извештај на оваа независна експертска група ќе биде претставен на Светското здравствено собрание во мај.