Тоа дали има основи за издавање наредба за претрес одлучува Судот, не јавниот обвинител. Доколку некој сметал дека претресот е незаконит, можел да вложи жалба до Кривичниот совет на Судот. Колку што ми е познато, таква жалба не е вложена, вели Русковска по денешнното соопштение од ЈО за утврдени пропусти во врска со претресот во Финансиската полиција минатот месец
Шефицата на Обвинителството за гонење организиран криминал и корупција Вилма Русковска го оспорува извештајот изготвен од Јавното обвинителството на Љубомир Јовески, во однос на претресот во Управата за финансиска полиција. Таа за Алсат вели дека јавниот обвинител нема законско право да се меша во постапувањето по конкретен предмет.
„Тоа дали има основи за издавање наредба за претрес одлучува Судот, не јавниот обвинител. Доколку некој сметал дека претресот е незаконит, можел да вложи жалба до Кривичниот совет на Судот. Колку што ми е познато, таква жалба не е вложена“,
вели Русковска за Алсат.
Изјавата на Русковска следува откако претходно денеска Јавното обвинителство објави соопштение од надзорот што го извршиле двајца јавни обвинители од Јавното обвинителство на Република Северна Македонија, постапувајќи по претставка од Управата за финансиска полиција, во кое се наведува дека се констатирани неправилности кои би значеле и незаконско постапување во врска со случајот со претресот од Обвинителството за организиран криминал и корупција во Финансиската полиција по анонимна кривична пријава за која порталот „Нетпрес“ објави дека е од бизнисмен од Дебар од февруари годинава во која тој наведува дека бил цел на притисоци и закани, како и на насилство.
„Дали е законски претресот одлучува судо кој ја издал наредбата“,
вели Русковска за А1.он.
„При вршењето на надзорот, јавните обвинители од Основното јавно обвинителство за гонење на организиран криминал и корупција кои постапувале во предметот беа задолжени да изготват информација за наводите во претставката. Меѓутоа, само еден од јавните обвинители постапи по задолжението и ја достави бараната информација. Одбивањето да се даде бараната информација за да се утврдат фактите за постапувањето по конкретниот предмет, го поткрепува сомнежот за недоследности во постапувањето“, се вели во денешното соопштение од Jавното обвинителство на Република Северна Македонија.
За ова Русковска за повеќе медиуми одговара:
„Не, од мене не е побарано да доставам изјава“
Понатаму, од ОЈО информираат дека лицата од Управата над кои се вршел претресот имаат полициски овластувања, па затоа за нив може да постапува единствено Специјализираното одделение за гонење кривични дела извршени од лица со полициски овластувања.
„Според тоа, тројцата јавни обвинители од Основното јавно обвинителство за гонење на организиран криминал и корупција кои постапувале по овој предмет, а не се дел од Специјализираното одделение, ненадлежно постапувале по кривичната пријава. Јавниот обвинител на Република Северна Македонија укажува дека предметот треба да се заведе во соодветен уписник и согласно распоредот да се додели на јавен обвинител кој е распореден во Специјализираното одделение“,
велат од ОЈО.
Во врска со ова, Русковска за Алсат вели:
„Прашање е дали директорот има полициски овластувања со оглед на тоа што го именува Владата. Во секој случај, предметот може да се презаведе од еден уписник во друг и тоа е законски“,
вели таа.
ОЈО утврдило неправилности и при барањето за претрес, што го одобрил надлежниот судија, односно дека во образложението на барањето на Судот погрешно му се даваат податоци дека Јавното обвинителство има основи на сомнение дека е сторено кривично дело, а во списите од предметот има само анонимна кривична пријава.
„Анонимната кривична пријава и конкретните наводи во неа, непоткрепени со ниту еден доказ или со други средства, можат да бидат повод за поведување кривична постапка, но таа не обезбедува определен степен на веројатност дека ќе се пронајдат траги на кривичното дело или предмети важни за кривичната постапка за да има основи за барање на претрес на простории на државен орган и претрес на лице“,
велат од ОЈО.
Управата за финансиска полиција на 25 јули информира дека до јавниот обвинител поднела претставка во врска со претресот што истражители од Основното јавно обвинителство за гонење на организиран криминал минатата недела го извршиле во просториите на институцијата, по наредба издадена од судија на претходна постапка од Основниот кривичен суд – Скопје, а врз основа на претходно доставено барање од Обвинителството.
Од Управата велат дека на истражителите од ОЈО за гонење на организиран криминал на 18 јули им бил дозволен непречен пристап во нивните простории, како и непречено извршување на наредбата, иако нејзината содржина, како што се тврди, не ги исполнувала формалните и материјалните-суштински основи за да биде издадена.
Според Управата за финансиска полиција, со наведените дејствија е нанесена голема штета на угледот на институцијата, на сите нејзини вработени и на угледот и интегритетот на нејзиниот директор, како и „намалување на довербата на граѓаните во правосудниот систем и рушење на темелите на една правна држава“.
Директорот на Управата за финансиска полиција, Арафат Муареми, тврди дека нападите кон него и институцијата со која раководи доаѓаат од ист центар и дека очекува да продолжат во наредниот период. Според него, намерата е очигледна, но тој не сака да коментира повеќе додека институциите не ги расчистат работите.
„Јас, Арафат Муареми, како директор на Управата за финансиска полиција и вработените во Управата, препознаваме и свесни сме дека овие намерно инсценирани и неосновани напади кон нас, доаѓаат од еден ист центар за којшто во Управата, но и во други институции веќе активно се водат соодветни постапки, во зависност од надлежностите на институцијата. Очекуваме ваквите напади и притисоци да продолжат и во наредните денови, сè додека органите на надзор и контрола активно работат на расчистување на неодамнешните случувања со незаконскиот претрес во нашата институција. Намерата на овие напади е повеќе од очигледна. Меѓутоа, во интерес на излегувањето на вистината на виделина, ќе се воздржам од дополнителни коментари на ваквите однапред целно смислени напади и сценарија и оставам надлежните институции да постапуваат согласно своите надлежности“,
пишува Муареми во писмената изјава испратена до медиумите кон крајот на минатиот месец.
Во денешното соопштение од ОЈО, Јовески ја задолжи Русковска целосно да го испита постапувањето по овој предмет и да му ги достави информациите за пропустите во постапувањето и фактите за евентуална одговорност.