Шефицата на Обвинителството за организиран криминал и корупција, Вилма Русковска, ги повикува оние што имаат докази за некаков криминал да поднесат пријава против неа, откако денеска обвинетиот во „Рекет“, Бојан Јовановски-Боки 13, излезе со обвинувања кон обвинителката.
„Ги охрабрувам сите што имаат нешто да пријават тоа да го сторат и заедно со сите докази што ги поседуваат да ги достават до МВР“,
вели Русковска.
Јовановски на крајот на денешното рочиште во Основниот кривичен суд во Скопје побара збор и во своето излагање ја прозва обвинителката.
Тој посочи дека испратил писмо до републичкиот обвинител Љубомир Јовески кој, пак, преку изјава порачал сè што има да каже во судница.
Она што сакам да го кажам, рече Јовановски, е дека со одбраната сака да поднесе 19 кривични пријави. Една, од нив, според неговите кажувања, би била и за Вилма Русковска.
„Дали лицето Вилма Русковска да го пријавам кај обвинителката Вилма Русковска? Каде да го пријавам лицето Вилма Русковска за корупција од 4 милиони евра за кои имам несоборливи докази?“,
праша Јовановски кој рече и дека сака да побара изземање на обвинителката од предметот.
Додека тој го зборуваше ова, Вилма Русковска не беше во судницата, исто како и на претходните две рочишта. Обвинението на нејзино место го застапува Гордана Смаќоска, која и ги испитува сведоци, а друштво ѝ прави и обвинителката Ивана Трајчева.
Адвокатот на Јовановски, Сашко Дукоски, пак, не сакаше да ги коментира наводите на неговиот клиент за наводната корупција од 4 милиони евра.
„Не би го коментирал, тој ќе го објасни тоа“, одговори Дукоски на новинарските прашања.
*Поврзани вести:
Боки 13: Каде да ја пријавам Вилма Русковска за корупција од 4 милиони евра?