И покрај тоа што анализата покажува релативна стабилност, надлежните упатија предупредување до сите економски оператори дека нема да се толерира какво било неосновано зголемување на цените на товар на граѓаните
Следењето на цените и спречувањето на неоправдани поскапувања биле во фокусот на состанокот што го одржаа министерот за економија и труд, Бесар Дурмиши, и директорот на Државниот пазарен инспекторат (ДПИ), Влатко Стојкоски, со претставници на производителите и дистрибутерите.
На средбата биле презентирани резултатите од најновата анализа на набавните и продажните цени, како и бруто-профитните маржи за над 700 производи. Според податоците од Министерството, кај најголемиот дел од економските субјекти засега нема значителни промени во профитните маржи.
И покрај тоа што анализата покажува релативна стабилност, надлежните упатија предупредување до сите економски оператори дека нема да се толерира какво било неосновано зголемување на цените на товар на граѓаните.
„Иако анализата покажува дека кај најголемиот дел од субјектите нема големи промени во профитните маржи, институциите ќе продолжат со засилени контроли и ќе преземат соодветни мерки доколку се утврдат злоупотреби или неосновано зголемување на цените“,
соопштуваат од Министерството за економија и труд.
Министерот Дурмиши очекува од сите учесници во синџирот на снабдување одговорно однесување, фер пазарни практики и почитување на законите.
Претходно денеска и заменик-министерот за економија и труд, Марјан Ристески рече дека доколку се констатира непазарно однесување и енормно зголемување на цените, додава тој, не е исклучено да се преземат соодветни мерки.
„Ако има непазарно однесување, енормни зголемувања на цените и т.н. воени профитери во вакви услови, кои сакаат да спечалат на грбот на граѓаните, имаме законски мерки кои може да се употребат. Нема да толерираме некоректно однесување, пред сè, кон граѓаните. Главната цел и приоритет на оваа Влада е, да повторам, заштитата на животниот стандард на граѓаните. Тоа е приоритет на сите нас“,
рече Ристески пред средбата.
Премиерот Христијан Мицкоски, кога беше завршена анализата на производите, рече дека очекува во најкраток период оние што ги имаат зголемено маржите во однос на истиот период минатата година за два до пет отсто, односно над постојните бруто профитни маржи од околу 10 отсто, да бидат предупредени.