Обвинителството докажа дека обвинетите ги сторија кривичните дела кои им се ставаат на товар. Од одбраната на Јанева се уверивме дека таа сѐ уште е во филмот „Чарлиевите ангели“.
Вака обвинителката Вилма Русковска денеска ги започна завршните зборови во случајот „Рекет“.
„Но, вистинскиот филм овде е борбата на доброто против злото. Видовме сѐ, ама не видовме ништо добро. По Јанева, заедно со ‘Чарлиевите ангели’, најголемиот дел од нас ги издигнавме на највисокиот пиедестал во една држава, а тоа е пиедесталот за борба за правда и правичност. Од тие што ги поддржувавме, доживеавме разочарување кога клучниот лик на ‘Чарлиевите ангели’ премина на страната на злото”,
рече Русковска.
Таа понатаму зборуваше за моментите кога дознала за случајот од бизнисменот Орце Камчев, кој е осомничен во случајот „Империја“.
„Кога Камчев дојде во обвинителството и кажа што се случувало, мислев дека се наоѓам во лош сон. Износите на пари што се барани, повеќето од нас не можеме да ги замислиме ни на сон, а не на јаве“,
рече Русковска.
Таа тврди дека неспорно од сведочењето на Ана Камчева се докажало како на Боки му се дадени првите 500 000 евра.
„Како течела исплатата на првите 500 000 евра се докажа од сведочењето на Камчева. Првите 350 000 евра ги носела во домот на Јовановски. А другите Камчев требало да ги исплати како позајмица од Зоран Милески-Кичеец. Сергеј Варошлија потврди дека ги видел Камчева и Милески еднаш како доаѓаат во канцеларијата на Боки, тоа не значи дека не доаѓале и повеќе пати. Варошлија рече дека еднаш и во домот на Боки ги видел како доаѓаат, но рече дека Ана Камчева не носела ништо. Но, најдете една жена која оди каде било без чанта“,
рече обвинителката.
Како течело договарањето за останатите еден милион, таа рече дека се докажало од исказот на Камчев, кој раскажал детално како се договарале по излегување од притворот во Шутка.
Во таа насока таа цитираше и делови од снимките кои беа објавени и во весникот „Ла Верита“.
Русковска се осврна и на сведочењата на останатите сведоци кои се појавија во судницата за овој случај.
По речиси шест месеци судење, случајот „Рекет“ денеска влегува во финиш. Во Основниот кривичен суд во Скопје утрово започна давањето заврши зборови, а прва тоа го направи обвинителката Вилма Русковска, по што ќе следуваат и адвокатите и обвинетите.
По ова ќе остане само изрекувањето на пресудата од првостепениот суд. Судскиот процес го води Васка Николовска-Масевска, како прв судија, и Софче Гаврилова-Ефремова, како втор судија, како и тројца поротници кои се дел од судечкиот совет.