Шефицата на Основното јавно обвинителство за гонење на организираниот криминал и корупција Вилма Русковска вели доколку ниту еден орган не преземе дејствија за расчистување на сомнежите за набавката на софтвер, поврзан со Драги Рашковски, обвинителството за кое таа е задолжена веројатно ќе отвори предмет.
„Министерството за внатрешни работи и Управата за финансиска полиција се органите што треба да откриваат сторители, тие се органи на прогон, и ако решат да не постапуваат тоа ќе го сториме ние“,
додава Русковска во својата изјава за „Слободен печат“, не сакајќи да ги коментира обвинувањата на опозиционерите за наводна блискост со поранешниот генерален секретар на Владата.
Претседателката на Државната комисија за спречување на корупцијата (ДКСК), Билјана Ивановска, минатата недела изјави дека ДКСК отворила предмет за набавка на софтверот од страна на поранешниот генерален секретар на Владата, Рашковски.
„По изнесените информации во медиумите, денеска на нашиот колегиум отворивме предмет сметајќи дека има доволно елементи за истражување на причините за набавката на тој софтвер, од една страна и од друга страна причината зошто тој сѐ уште не е во употреба. И, она што беше ризично од наш аспект, несоодветната комуникација меѓу институциите и отсуството на системски пристап за утврдување на потребите. Тоа беа основните елементи по кои ние постапивме и по сопствена иницијатива, а по допрен глас од медиумите отворивме предмет“,
објасни Ивановска.
Рашковски деновиве е актуелен во јавноста по сториите што ги објави „360 степени“ поврзани со набавката на софтверот за сообраќајни прекршоци, која тој ја направил во времето кога беше генерален секретар на Владата.
„360 степени“ пред една недела ја објави првата сторија поврзана со набавката на софтверот за сообраќајни прекршоци во вредност од 81 000 евра, кој Рашковски го набавил за потребите на Министерството за внатрешни работи, а оттаму велат дека ниту знаеле дека таков софтвер е набавен ниту, пак, им треба.
Подоцна, „360 степени“ откри дека токму Рашковски е автор на таков сличен софтвер, а во третата од низата стории на оваа тема објавени се нови спорни околности околу овој случај.
*Сите стории поврзани со набавката на софтверот може да се прочитаат на следниве линкови:
Асоцијацијата на пронаоѓачи го разголи Рашковски: Софтверот е негов
(ВИДЕО) Рашковски прво го платил софтверот, па дури потоа го тестирал
Рашковски за „Фокус“ самиот потврди дека е во Мексико
Не коментирам индивидуални одлуки, рече Филипче за патувањето на Рашковски во Мексико