Германскиот министер за Европа Михаил Рот по денешната средба во Берлин со вицепремиерот за европски прашања Никола Димитров порача дека Северна Македонија треба да ги почне преговорите што побргу.
Тој истакна дека во заклучоците на Советот веќе се договориле дека нештата се прилично позитивни.
„Од моја страна, Северна Македонија ги исполни условите и сега е право време да испорачаме. Треба да почнеме со пристапните преговори што е можно побргу“,
нагласи Рот, пренесе МИА.
Тој вели дека Германија очекува до крајот на нејзиното претседавање со ЕУ (до крајот на 2020 година) да биде одржана првата Меѓувладина конференција и да почнат пристапните преговори.
„Во својство на претседавач со Советот за општи работи, гордо изјавувам дека планираме да започнеме со организација на првата Меѓувладина конференција и да ги започнеме пристапните преговори со Северна Македонија. Прилично сме оптимистични дека можеме да започнеме со пристапните преговори пред крајот на нашето претседавање. Во моментов имаме многу плодна и позитивна дискусија со другите земји членки на ЕУ, која треба да заврши со договор за рамката за пристапните преговори“,
рече Рот.
Од Секретаријатот за европски прашања (СЕП), пак, во краткото соопштение на веб-страницата соопштија дека германската страна на средбата информирала за динамиката на усвојувањето на Преговарачката рамка во која што треба да бидат пренесени елементите кои ги воведува новата методологија.
Димитров, пак, рекол дека оваа година ќе биде запеметена по тоа што земјава и нејзините сојузници ќе имаат причина за славење.
„2020 година и покрај сите предизвици ќе биде запаметена и како годината во која Северна Македонија, нејзините сојузници и партнери имаат причина за славење. За успешно заокружување на годината, по одлуката во март, потребна е уште една значајна одлука која што ќе го отвори патот кон конечно остварување и на втората стратешка цел – полноправно членство во Европската Унија. Со пријател како Германија на чело на Унијата, заедничкиот успех е на дофат“,
рекол Димитров.