Според шефот на дипломатијата Бујар Османи, Албанија има право да го крене гласот, меѓутоа тој порачува дека раздвојување на двете држави нема да ѝ биде од долгорочен интерес на Тирана. Според него, засега немаме сигнал од ниту една земја членка која би преферирала одвојување на пакетот
Шефот на романската дипломатија Богдан Ауреску денеска од Скопје порача дека Романија нема да поддржи раздвојување на Северна Македонија и Албанија на патот кон Европската Унија.
„Нема разговори за раздвојување на Северна Македонија и Албанија. Не го поддржуваме тоа раздвојување. Важно е да се најде решение што е можно побрзо за да се започнат преговори со двете земји заедно“,
рече Ауреску на заедничката прес-конференција со својот македонски колега Бујар Османи.
Ауреску истакна дека Романија е цврст поддржувач на членството на Северна Македонија во ЕУ, и во исто време тесно работи на многу комплексни прашања.
Османи, пак, посочи дека одлуката за раздвојување на Скопје и Тирана е на земјите членки и дали тие ќе постигнат консензус Албанија да ги почне преговорите.
„Кажав и претходно дека не е долгорочен интерес на Албанија да се одвои од нас на овој пат. Така што, ако барем до една фаза во процесот додека политичките критериуми се клучни си помагаме еден на друг, долгорочно ќе се создаде една синергија која го турка целиот процес напред. Се разбира дека Албанија има право да го дигне гласот, да каже ги исполнивме сите критериуми, зошто јас сум заложник на досието на друга држава. Меѓутоа, сум свесен дека и Албанија го дели мислењето дека долгорочно тоа не и одговара и многу земји-членки сметаат дека тоа ќе ја влоши регионалната динамика ако тоа се случи“,
истакна Османи.
Според него, засега немаме сигнал од ниту една земја членка која би преферирала одвојување на пакетот.
„Сите се заинтересирани да се заврши оваа работа за двете држави. Но дека прашањето ќе се актуализира од јуни, доколку ние не ги почнеме преговорите, тоа сум сигурен. Дека Албанија ќе биде многу погласна, дека ќе се обиде да лобира и дека ќе има земји членки кои ќе кажат дека навистина ќе треба да се најде решение, а тоа нас нема да ни одговара. Затоа треба да сме фокусирани да не дојдеме во ситуација ова прашање да се актуализира“,
оцени Османи.
Албанскиот премиер Еди Рама во неколку наврати најави дека ќе побара раздвојување на Скопје и Тирана на патот кон ЕУ доколку Северна Македонија не го реши до јуни прашањето со Бугарија.
На прес-конференцијата романскиот шеф на дипломатијата испрати и порака дека тие се силен поддржувач на зачленувањето на Северна Македонија во ЕУ.
„Со Северна Македонија имаме одлични билатерални односи и сме одлични партнери во Северноатлантската алијанса. Романија е цврст поддржувач на пристапувањето на Северна Македонија во Европската Унија. Во исто време тесно работиме на комплексни прашања, дискутиравме како да се справиме со ефектите од руската инвазија врз Украина. Во тој контекст среќен сум што помогнавме за евакуација на македонски државјани од Украина преку Романија“,
рече Ауреску.
Тој кажа и дека заедно со Османи ја повториле осудата на руската агресија во Украина и таргетирањето цивили и порача дека сите одговорни за овие злосторства треба да излезат пред лицето на правдата. Исто така, посочи и дека му честитал на македонскиот колега за целосната усогласеност на надворешната политика на Северна Македонија со таа на ЕУ и поддршката на санкциите за Русија.
Двајцата шефови на дипломатиите разговарале и како да се зајакне економската соработка каде за разлика од минатата година сега има зголемување на трговската размена од 17,4 отсто, а исто така потпишаа и Меморандум за соработка меѓу двете министерства за надворешни работи за дипломатска обука, бидејќи, како што рече Ауреску, обуката на дипломатите во овие денови е сè покомплексна и повеќедимензионална. Тие потпишаа и втор меморандум, кој како што рече Османи, пак, се однесува на примена на Договорот за социјално осигурување помеѓу Северна Македонија и Романија.