Идејата медицинските сестри од четврта година да стажираат во ковид-центрите не е безбедна, сметаат од Здружението на медицински сестри, техничари, акушерки и стоматолошки сестри (ЗМСТАС).
Во соопштение до јавноста тие реагираа на најавите на министерот за здравство Венко Филипче дека е можно учениците од четврта година од средните медицинските училишта да бидат ангажирани да им помагаат на здравствените работници во борбата со ковид-19.
„Ваквата идеја не е безбедна за учениците. Во еден ваков период кога се носат мерки за зачувување на здравјето на учениците и се препорачува онлајн-настава со цел да се намали трансмисијата во училишните клупи. не е соодветна идејата малолетни ученици и недоусовршен кадар од средните медицински училишта да бидат впуштени директно во најголемите жаришта на оваа пандемија. Ние, професионалците од сестринската професија, сметаме дека ризикот е многу голем“,
стои во реакцијата на Здружението.
Оттаму посочуваат дека во услови кога се соочуваат со дефицит на кадар, ангажирањето на учениците би ја отежнало работата затоа што некој треба да ги учи и да ја надгледува нивната работа и дека тоа би донело ризик од ширење на вирусот.
„Во една за нас исклучително тешка ситуација со две медицински сестри на 30 пациенти, ангажман на учениците како помош дополнително би ги отежнало работите, пред сѐ ризикот и нивната безбедност, и нашата одговорност за нив кои треба да учат – практицираат, а ние треба да ги менторираме. Учениците ако се заразат можеби ќе поминат асиптоматски, но што е со нивните најблиски? Ако е ова решение недовршени кадри да нѐ надополнуваат, ги имаме четирите високообразовни институции за идните дипломирани медицински сестри кои барем се полнолетни“,
додаваат од извршниот одбор на Здружението.