Оливер Ристовски од коалицијата СДСМ – БЕСА во предизборно соочување на „360 Степени“ со претставниците на четирите најголеми политички блока даде оценка за владеењето на СДСМ и состојбата во правосудство и борбата против корупцијата и криминалот.
„Периодот на владеење на СДСМ е околу две и пол години активни, од јуни 2017 до февруари годинава, до распуштање на парламентот. Споредено со последните 10 години, мислам дека не можеме да споредуваме. Имавме еден страшен период од 10 години, барем кога дојдов во министерството, кога дојде новата гарнитура во јуни, затекнавме хаос во Министерството за правда. Можам да зборувам од моја гледна точка како заменик министер за правда. За две и пол години направивме многу повеќе отколку што тие направиле за 10 години претходно. А растуриле многу. Целта на министерството, или должноста на Министерството за правда, беше да се постават темелите, особено во делот на законите, за нормално функционирање на правосудството. И ние тоа успеавме да го оствариме. Како во првата година кога министерот беше претставник на ДУИ и за следната една и пол година. Донесовме клучни закони кои беа многу важни за европските перспективи на државата. Зар мислите дека ќе бевме примени во НАТО и ќе отпочнуваме преговори на есен со ЕУ ако не ја направевме оваа подлога во правосудството? Значи, целиот удар беше всушност на правосудството. Јас ќе споменам само неколку, Законот за Судскиот совет, Законот за судовите. Она што многу ги интересира граѓаните, Законот за бесплатна правна помош, Законот за укажувачите, Законот за извршување на санкциите. Целата борба со ужасниот систем во затворите и нивната состојба и финално, на крајот на мандатот на Владата, односно на почетокот на техничката влада, Законот за јавно обвинителство. Сето ова ги постави сите основи за можноста државата да ги почне преговорите со ЕУ“
вели Ристовски.