Според претседателот на Синдикатот на УКИМ, Ангел Ристов, потпишувањето на Колективниот договор со кој се предвидува значително покачување на платите на наставниот и ненаставниот кадар при Универзитетот ќе биде од историско значење за УКИМ и за развојот на науката и образованието во земјава
Не може да се очекува развој на науката и напредок на Универзитетот „Св. Кирил и Методиј“ на ранг-листата на најдобри универзитети во светот доколку не се вложува во високото образование.
Ова во интервју за Нова Македонија го посочи професорот Ангел Ристов од правниот факултет „Јустинијан Први“ и претседател на Сојузот на синдикати на УКИМ, кој неодамна, во име на Синдикатот со Собранието го потпиша Колективниот договор на ниво на работодавач.
Во интервјуто, Ристов вели дека Синдикатот првично бил формиран пред три години за првпат во историјата на Универзитетот поради исклучително тешката состојба на вработените, чии плати, како што вели, се неколкупати помали од платите на универзитетите во регионот.
„Екстремно ниските плати се само еден од проблемите на УКИМ. Со години се влошува положбата на Универзитетот – нема инвестирања во наука, нема истражувања, нема стручна литература, нема средства за истражувања, нема нов кадар, проекти, пристап до бази на податоци, субвенционирање на издавањето учебници и монографии… Со други зборови, нема елементарни услови за научноистражувачка работа што се предуслов за високо рангирање на УКИМ. Од друга страна, постојано се говори како УКИМ паднал на ранг-листата на најдобрите универзитети во светот. Овој пад се должи на запоставувањето на Универзитетот, кое трае подолг временски период, и на необезбедувањето финансиски и материјални услови за остварување на научноистражувачката дејност“,
вели Ристов.
Со потпишувањето на Колективниот договор, пак, кој ќе се применува во 2024 и 2025 година, се предвидува значително покачување на платите на наставниот и ненаставниот кадар, што, како што додава Ристов, е во согласност со заложбите и барањата на Синдикатот. Потпишувањето на овој Колективен договор, според него, ќе биде од историско значење за УКИМ и за развојот на науката и образованието во земјава.
„Државата конечно, по многу поминати години, ќе даде вистинска поддршка за развојот на високото образование, без кое не се можни општествениот развој и напредок на државата“,
додава тој.
По долгите преговори кои завршија со потпишување на Колективниот договор, претседателот на Синдикатот вели дека од државата ќе се очекува да го исполни она што е договорено, со оглед на тоа што овој договор е правно обврзувачки и не може еднострано да се укине или менува.