Претседателката на ДОМ, Лилјана Поповска, на Фејсбук ги осуди ставовите на премиерот Заев, додека од ДС на Павле Трајанов нема да поддржат менување или ревизија на Договорот за добрососедство на штета на македонските национални интереси
Либерално-демократската партија, чиј член е и министерот за локална самоуправа Горан Милевски, бара средба со коалициските партнери за да се разговара за ЕУ-перспективите, особено во контекст на ветото од Бугарија и интервјуто на премиерот Зоран Заев за БГНЕС.
Ова е еден од заклучоците што Извршниот одбор на ЛДП ги донел на вчерашната седница.
Тие инсистираат на доследно почитување на ратификуваните меѓународни договори кои ги обврзуваат договорните страни, потсетувајќи дека сите постојни договори го потврдуваат несомненото постоење на македонскиот народ, македонскиот јазик и македонската култура.
„ЛДП го осудува говорот на омраза, особено на неприфатливиот говор кој го негира самоидентификувањето на секоја личност и на секој колективитет, вклучително и понижувањето на македонскиот народ и македонската нација“,
заклучил Извршниот одбор на ЛДП.
Претходно, осуда за изнесените ставови на премиерот Зоран Заев искажа и поранешната претседателка на ДОМ, Лилјана Поповска. Таа на својот профил на Фејсбук напиша дека неприфатливи се такви изјави од македонски политичари за сериозни прашања.
„Ужас до болка. Ако на ЕУ ѝ треба вакво национално и ментално самоубиство, тогаш ЕУ, каква што ја почитуваме и посакуваме, престанала да постои!? Неприфатливи се вакви изјави од македонски политичари за сериозни прашања! Во чие име се зборува? Никој нема мандат за ова!“,
напиша Поповска.
Од Демократскиот сојуз, пак, велат дека нема да поддржат менување или ревизија на Договорот за добрососедство на штета на македонските национални интереси.
„Премиерот, како и сите македонски граѓани, има право на личен став за односите со Република Бугарија и за начините на решение на спорот, но тој ја има и одговорноста тоа што го говори да не ги повредува чувствата на Македонците и да изнаоѓа решенија кои ќе ги заштитат државните и националните интереси“,
се вели во соопштението на Демократски сојуз, партија која е дел од владината коалиција.