Премиерот вели дека очекува до крајот на годината да бидат пополнети испразнетите места во Софија, Белград, Вашингтон, Брисел, Братислава… и дека МНР и претседателот мора да носат соодветни одлуки ако и натаму, како што вели, се злоупотребува Комисијата за надворешни работи
Премиерот Зоран Заев изрази денеска очекување дека до крајот на годинава ќе бидат бидат пополнети сите празни амбасадорски места во земјава и дека испраќањето на идните амбасадори нема да биде закочено во собраниската Комисија за надворешни работи, со која претседава Антонио Милошоски од ВМРО-ДПМНЕ.
Иако не искажа директна намера Комисијата за надворешни работи да биде заобиколена доколку таму закочат новите именувања во важни мисии за земјава, Заев рече дека институциите што се надлежни за пополнување на дипломатската мрежа мора да ги преземат своите надлежности, односно да носат соодветни одлуки, во полза на имиџот на државата, додека за одбраните на тезите на амбасадорите во собраниската Комисија рече дека е повеќе куртоазна отколку законска обврска.
Заев како пример ги наведе последните најави на Милошоски дека нема да дозволи универзитетскиот професор Љубомир Фрчкоски да замине како македонски амбасадор во седиштето на ОН во Њујорк, за каде што веќе е именуван, така што останува уште да ја презентира својата платформа пред матичната собраниска Комисија.
Бугарија, Србија, САД, Белгија, Словачка, Израел, Турција се државите што ги наброи Заев во кои С Македонија треба да испрати амбасадори до крајот на годината, а каде што првите дипломатски позиции се празни долго време.
„Ние од поодамна имаме одлуки за речиси сите места. Проблемот е во парламентот, каде што претседателот на Комисијата ја злоупотребува одбраната на тезите за да го кочи процесот, иако тој дел од процедурата, главно, повеќе е за да се искаже респект кон Собранието отколку што е законска обврска. Последни во низата се случувањата со Фрчковски, за кого претседателот на Комисијата директно кажа дека ќе направи сѐ за тој да не замине на функцијата. Сега треба да се пополнат и други сериозни позиции, треба брзо да се носат одлуки. Ако и по три-четири години се блокираат именувањата, сите надлежни институции – МНР, Владата, претседателот треба да носат соодветни одлуки, за да го избегнеме непријатниот момент за нашата земја со неиспраќање амбасадори. Ако со еден ваква фигуративен аспект, кој пред сѐ претставува куртоазија кон парламентот, и натаму се кочи работата, апелирам до МНР и до претседателот да носат соодветни одлуки и верувам дека до крајот на годината ќе имаме решенија за сите овие испразнети места“,
изјави Заев одговарајќи на новинарско прашање за пополнувањето на испразнетите амбасадорски места на денешната прес-конференција.
Неодамна, четворица нови амбасадори на земјава во Русија, Индија, Австрија и Италија успејаа да ги презентираат своите платформи, по петмесечно чекање да се закаже продолжение на седницата на Комисијата за надворешни работи.
Во тој контекст, Заев, коментирајќи за вчерашната одлука на руското МНР да го прогласи за персона нон грата вториот секретар во македонската амбасада во Москва, рече дека амбасадорското место во Русија наскоро ќе биде пополнето и дека земјава нема да остане без свој претставник во тоа дипломатско претставништво.
Претседателот на парламентот Талат џафери минатата седмица на брифинг со новинари оцени дека ја гледа нефункционалноста на законодавниот дом во неработењето на собраниските комисии, каде што се заглавени закони кои треба да бидат усвоени на пленарна седница.
„Проблемот е во одговорноста или неодговорноста на претседателите на комисиите, без оглед на тоа од која партија се“,
рече Џафери, кој тогаш коментираше и за блокадите во Комисијата за надворешни работи, во делот на испраќањето на амбасадорите.
Според член 120 од собранискиот Деловник, ако претседател на Комисија не свика седница кога е должен тоа да го стори, седницата на тоа тело ја свикува претседателот на парламентот.
