Промена има во оцената на Холандија за Албанија, со оглед на тоа што во писмото од Министерството за надворешни работи до парламентот во Хаг се вели дека за разлика од ланскиот скептицизам околу подготвеноста на Тирана, Холандија заедно со останатите земји членки кои имаа забелешки, сега смета дека е направен доволен напредок
Кабинетот на премиерот Марк Руте го известил тамошниот парламент дека на сесијата на Советот за општи работи на ЕУ (ГАК), која ќе се одржи на 22 јуни, холандската влада има намера да го поддржи прифаќањето на преговарачката рамка и одредувањето датум за одржување на првата меѓувладината конференција со Северна Македонија и со Албанија.
Во однос на Северна Македонија, ставот на Холандија не отстапува од позитивната одлука донесена во март минатата година и холандската влада ќе настапи пред европските партнери со барање првата меѓувладина конференција да се одржи веднаш штом ќе биде усвоена преговарачката рамка.
Промена има во однос на Албанија, со оглед дека Холандија беше една од државите што имаа забелешки и се противеа на отворањето на процесот на преговори со оваа земја.
За разлика од позицијата за Северна Македонија, ставот за Албанија е издвоен во посебен документ напишан на 11 страници. Во него се нагласува дека за разлика од ланскиот скептицизам околу подготвеноста, Холандија заедно со останатите земји членки кои имаа забелешки, сега смета дека е направен доволен напредок во однос на потребните услови за старт на преговорите.
Дефинитивниот став што ќе го презентира Холандија пред европските партнери ќе биде утврден по парламентарната дебата која ќе се одржи на 16 јуни. Ставовите на парламентот не се задолжителни за владата, но таа вообичаено ги следи.
Зеленото светло од Холандија не значи старт на преговорите за С Македонија доколку Бугарија остане на своето вето. Сепак, оваа поддршката заедно со синоќешната директна порака од Париз, говори дека земјите членки го стеснуваат кругот околу официјална Софија.