Судиите оцениле дека пратениците се самораспуштиле согласно Уставот, во период кога не беше прогласена пандемија со коронавирусот ниту, пак, имаше вонредна состојба во државата
Распуштањето на деветтиот состав на парламентот е завршена работа, од која нема враќање назад, и покрај големото одолговлекување на уставно предвидениот период од 60 дена во кој требаше да бидат распишани изборите.
Уставниот суд на денешната седница ја отфрли иницијативата на Тодоро Петров од СМК за оценување на одлуката на пратениците од 16 февруари годинава со која тие се самораспуштија, а веднаш потоа спикерот Талат Џафери распиша избори за 12 април. Тоа што еден месец подоцна по распуштањето на парламентот беше прогласена вонредна состојба, а изборните дејствија беа замрзнати, според мнозинството уставни судии, е неочекувана и непланирана состојба.
Во однос, пак, на одлуката за самораспуштање, за која гласаа 108 од вкупно 120 пратеници, уставните судии оцениле дека е донесена согласно со Уставот. Односно, дека Собранието е надлежно да носи таква одлука, со најмалку 61 глас, и дека одлуката е изгласана во регуларен период кога не беше прогласена пандемија ниту, пак, вонредна состојба во земјава.
Оценката на судиите е дека сега, и со оглед на прогласената вонредна состојба, не е неопходно парламентот да се состане, затоа што има други контролни механизми за чекорите на Владата. Еден од тие механизми, како што се посочува, е Уставниот суд да ги разгледува уредбите со законска сила што ги носи техничката влада, од аспект на тоа дали се во согласност со Уставот.
Наспроти тоа, со иницијативата на Петров за оценка на уставноста на одлуката за распуштање на Собранието се проблематизира и вонредната состојба што ја прогласи шефот на државата. Според иницијативата, парламентот треба да се состане за да воспостави контрола врз извршната власт која ги презема функциите на законодавната, така што носи уредби со законска сила.