Заменик-претседателот на Собранието Горан Мисовски најави дека дополнително ќе се закаже седницата на која ќе се гласа
Според пратениците од опозициската ВМРО-ДПМНЕ одлуката со која се избрани уставните судии е незаконска. Пратениците, пак, од владејачкото мнозинство потенцираа целта на ВМРО-ДПМНЕ е да предизвика уставна криза
Расправата на пленарната седница на чиј дневен ред беше изборот на уставните судии заврши доцна вечерва, но гласање немаше. Заменик-претседателот на Собранието Горан Мисовски најави дека дополнително ќе се закаже седницата на која ќе се гласа.
Откако вчера доцна попладне пратениците конечно го усвоија дневниот ред и ја започнаа 88. пленарна седница, во собранието денеска продолжи дебатата за избор на Фатмир Скендер и Татјана Васиќ-Бозаџиева за членови на Уставниот суд.
Во попладневниот дел од денешното продолжение на седницата во салата беа присутни мал број пратеници. Пратениците од опозициската ВМРО-ДПМНЕ упатуваа критики за компетентноста на Татјана Васиќ Бозаџиева.
Опозициските пратеници сметаат дека со самото вакво однесување на владејачкото мнозинство во Собранието, дополнително се девалвира не само Уставниот суд како институција, туку и Собранието, а најмногу довербата на граѓаните во правосудството.
„Уставниот суд ќе продолжи да биде партиско собиралиште на членовите на СДСМ и ДУИ. Нема независен уставен суд, ако судиите се зависни“,
потенцираа од опозициската ВМРО-ДПМНЕ.
Според пратениците од опозициската ВМРО-ДПМНЕ одлуката со која се избрани уставните судии е незаконска. Посочија на Извештајот на ЕК каде, како што велат, за избор и именување на уставен судија се бара стручност и компетентност, а не изборот да се заснова на политичка основа.
Пратениците од владејачкото мнозинство, пак, потенцираа дека ВМРО-ДПМНЕ не сакаат да функционира судството и зад себе имаат, како што велат, голем криминален багаж. Според нив, целта на ВМРО-ДПМНЕ е да предизвика општа криза во државата, како парламентарна криза, политичка криза и сега сакаат да се предизвикаат и уставна криза.
Во претпладневните часови пратеничката група на ВМРО-ДПМНЕ поднесе барање за интерпелација на претседателката на Комисијата за избори и именувања, Марија Георгиевска од СДСМ, поради процедурата за избор на уставни судии.
Барањето, како што рече пратеникот Антонијо Милошоски, се поднесува затоа што според ВМРО-ДПМНЕ Георгиевска неделовнички и неуставно на сè уште незавршена точка на дневен ред и незавршена комисија поднела парцијален извештај до претседателот на Собранието, Талат Џафери за избор на уставните судии.
На ова пратеничката од редовите на СДСМ и претседателка на собраниската Комисија за избори и именувања Марија Георгиевска денеска изјави дека иницијативата на ВМРО-ДПМНЕ за нејзина интерпелација од претседателската позиција во Комисијата не е ништо друго освен, како што рече, обид да се предизвика уставна криза.
Георгиевска во своја одбрана вели дека го известила претседателот на Собранието Талат Џафери оти собраниското тело со мнозинство гласови се изјаснило за изборот на двајца предложени кандидати за уставни судии и дека постапката за нивниот избор може да се префрли на пленумот.
Очекувањата на ВМРО-ДПМНЕ, како што рече Милошоски, се интерпелацијата во најкус можен рок да се стави на пленарна седница, како и дека истата ќе биде поддржана од оние пратеници што веруваат во политиката како професија и во Деловникот за работа како демократска процедура.
Околу ова прашање, пратениците од власта и опозицијата веќе трет ден си разменуваат обвинувања. Ова дојде откако дебатата за избор на тројца уставни судии во Комисијата за прашања на изборите и именувањата „заглави“ кога на ред дојде предлогот републичкиот обвинител Љубомир Јовески да стане уставен судија. Јовески е последен од вкупно деветте предложени кандидати од кои Комисијата треба да утврди тројца што ќе треба да бидат изгласани и на пленарна седница.
Од претходните осум, мнозинството во оваа Комисија даде зелено светло за апелацискиот судија Фатмир Скендер и правничката Татјана Васиќ-Бозаџиева – двајцата предложени од пратеници од власта. Другите шестмина предложени од ВМРО-ДПМНЕ не добија поддршка во Комисијата. Стануваше збор за: обвинителот од Вишото јавно обвинителство во Штип Тодор Витларов; охридскиот обвинител Воислав Димоски; пензионираниот универзитетски професор од Правниот факултет во Скопје, како и поранешен пратеник и претседател на Собранието Саво Климоски; професорка од Правниот факултет, Родна Живковска; управната судијка од Битола Весна Јовановска; и пензионираниот гостиварски судија Бранко Секулоски.
Кога дебатата стигна до Јовески, од ВМРО-ДПМНЕ јасно порачаа дека нема да дозволат тој да помине и да се изберат уставни судии што се по мерка на власта.
Од друга страна, Уставниот суд со месеци функционира со само пет од вкупно девет судии. На уште една судијка на 7 декември годинава ќе ѝ истече мандатот што ќе значи дека Уставен нема да има кворум ни за одржување на седници.