Очекувањата на ВМРО-ДПМНЕ се интерпелацијата во најкус можен рок да се стави на пленарна седница, како и дека таа ќе биде поддржана од оние пратеници што веруваат во политиката како професија и во Деловникот за работа како демократска процедура
Според пратениците од мнозинството, пак, тоа не е прекршување на процедурата зашто во случајот не станува збор за носење закон туку за избор и именување на функција, при што за секој кандидат се гласа посебно
Пратеничката група на ВМРО-ДПМНЕ го поднесе најавеното барање за интерпелација на претседателката на Комисијата за избори и именувања, Марија Георгиевска од СДСМ, поради процедурата за избор на уставни судии.
Барањето се поднесува, како што рече пратеникот Антонио Милошоски, затоа што според ВМРО-ДПМНЕ Георгиевска неделовнички и неуставно на сè уште незавршена точка на дневен ред и незавршена комисија поднела парцијален извештај до претседателот на Собранието, Талат Џафери за избор на уставните судии.
„Тие уставни судии што им одговараат, ги поднесуваат на гласање без да биде воопшто завршен процесот на дискусија на самата седница каде што именуваната Марија Георгиевска не ја закануваше цели десет месеци до пред некое време. Тоа е спротивно на членот 128 од Деловникот, каде што е точно наведено дека работното тело заседава и откако ќе заврши седницата подготвува извештај и записник за тоа што се одлучило на самото работно тело, а оваа седница на Комисијата за избори и именувања не е завршена“,
рече Милошоски.
Вториот прекршок, според него, е на членот 129 од Деловникот, каде што пишува дека известител во однос на кои било седници од работните тела најчесто е претседателот на тоа работно тело пред пленумот.
„Ние видовме вчера дека претседателката на Комисијата за избори и именувања Марија Георгиевска немаше дури ни храброст да се јави пред Собранието, пред пратениците да објасни зошто поднела парцијален извештај, зошто ја прекинува Комисијата и пишува извештај без да биде истата завршена и барем да беше присутна и да земе збор и да каже зошто смета дека овие селективно одбрани кандидати за уставни судии заслужуваат да бидат членови на Уставниот суд“,
рече пратеникот на ВМРО-ДПМНЕ.
Опозициските пратеници сметаат дека со самото вакво однесување на владејачкото мнозинство во Собранието, дополнително се девалвира не само Уставниот суд како институција, туку и Собранието, а најмногу довербата на граѓаните во правосудството.
Очекувањата на ВМРО-ДПМНЕ, како што рече Милошоски, се интерпелацијата во најкус можен рок да се стави на пленарна седница, како и дека истата ќе биде поддржана од оние пратеници што веруваат во политиката како професија и во Деловникот за работа како демократска процедура.
Околу ова прашање, пратениците од власта и опозицијата веќе трет ден си разменуваат обвинувања. Ова дојде откако дебатата за избор на тројца уставни судии во Комисијата за прашања на изборите и именувањата „заглави“ кога на ред дојде предлогот републичкиот обвинител Љубомир Јовески да стане уставен судија. Јовески е последен од вкупно деветте предложени кандидати од кои Комисијата треба да утврди тројца што ќе треба да бидат изгласани и на пленарна седница.
Од претходните осум, мнозинството во оваа Комисија даде зелено светло за апелацискиот судија Фатмир Скендер и правничката Татјана Васиќ-Бозаџиева – двајцата предложени од пратеници од власта. Другите шестмина предложени од ВМРО-ДПМНЕ не добија поддршка во Комисијата. Стануваше збор за: обвинителот од Вишото јавно обвинителство во Штип Тодор Витларов; охридскиот обвинител Воислав Димоски; пензионираниот универзитетски професор од Правниот факултет во Скопје, како и поранешен пратеник и претседател на Собранието Саво Климоски; професорка од Правниот факултет, Родна Живковска; управната судијка од Битола Весна Јовановска; и пензионираниот гостиварски судија Бранко Секулоски.
Кога дебатата стигна до Јовески, од ВМРО-ДПМНЕ јасно порачаа дека нема да дозволат тој да помине и да се изберат уставни судии што се по мерка на власта.
Од друга страна, Уставниот суд со месеци функционира со само пет од вкупно девет судии. На уште една судијка на 7 декември годинава ќе ѝ истече мандатот што ќе значи дека Уставен нема да има кворум ни за одржување на седници.
Тоа беше и образложението зошто претседателката на Комисијата за прашања на изборите и именувањата се реши да испрати предлог за само двајца наместо тројца судии. Според неа и нејзините колеги од мнозинството тоа не е прекршување на процедурата зошто во случајот не станува збор за носење закон туку за избор и именување на функција при што за секој кандидат се гласа посебно.
„Имајќи го предвид постојниот состав на Уставниот суд, од девет судии во моментов има пет судии, што може да го доведе во прашање остварувањето на неговите надлежности, потребно е утврдените предлози за избор на судии на Уставниот суд на Комисијата за прашања на изборите и именувањата да бидат разгледани и од Собранието на Република Северна Македонија;
„Расправата во Комисијата за утврдување на третиот предлог за судија на Уставниот суд за која има пријавено пратеници за дискусија е во тек и ќе продолжи понатаму, но не треба да претставува причина за нефункционалноста на Уставниот суд. Ова дотолку повеќе што и Комисијата и Собранието за секој предлог одлучуваат посебно“,
пишуваше во дописот што Георгиевска го испрати до Џафери.
ВМРО-ДПМНЕ, пак, смета дека неколку пати го повтори ставот дека мора да се испрати предлог за уставни судии кога ќе заврши расправата за сите кандидати.
„Имаме девет кандидати. Јас како член на оваа комисија имам право за некого да гласам ’за‘, за некого ’против‘. Крајниот предлог во целина доаѓа со трите предлози и тоа е тоа што ние треба да го изгласаме и да го пратиме како извештај до претседателот на Собранието. Јас можам да имам издвоено мислење, можеби првиот предлог ми се допаѓа, но за вториот сум против, а на крај во целина за тројцата како комплет ќе гласам ’за‘ или ’против‘ … Ако власта вели дека е така, зошто веднаш по изборот на првиот кандидат не го пуштија до Собрание како точна на дневен ред и да го избереме. Изборот на првиот предлог во Комисијата го направивме пред 3-4 месеци“,
рече вчера координаторот на пратеничката група на ВМРО-ДПМНЕ, Никола Мицевски.
Интерпелацијата која денеска ја поднесоа, вчера Мицевски ја најави со зборовите дека „тоа е најмалку со што ќе се соочи претседателката на Комисијата“, а ден претходно тој не ја отфрли можноста и да се поднесат кривични пријави за повеќе лица.