Радев со осуда за нападот на клубот во Охрид: С Македонија мора да разбере оти патот кон ЕУ минува низ признавањето на правата на Бугарите

Бугарскиот претседател порача дека државниот врв во Северна Македонија и целокупното македонско општество мора да разберат оти патот кон Европската Унија минува преку признавање и почитување на македонските Бугари и бугарското културно-историско наследство

Апсолутно неприфатлив вандалски чин и агресија која се гради со децении кон Бугарија и бугарскиот народ. Вака претседателот на Бугарија, Румен Радев, го коментира последниот, трет по ред напад на бугарскиот клуб „Цар Борис Трети“ во Охрид, во кој, овој пат беше употребено и огнено оружје.

Радев порача дека државниот врв во Северна Македонија и целокупното македонско општество мора да разберат оти патот кон Европската Унија минува преку признавање и почитување на македонските Бугари и бугарското културно-историско наследство.

„Ова е единствениот начин“,

рече Радев.

Бугарскиот претседател се осврна и на периодот кога, како што вели, Бугарија имала огромен притисок за да дозволи безусловно отпочнување на преговорите на Северна Македонија со Европската Унија.

„Двапати ставив вето и го покренав прашањето со нашите сојузници и партнери во ЕУ за правата на македонските Бугари – дека нивните права мора прво да се гарантираат и да се запишат во Уставот на државата и дури потоа да се отвори патот за преговори“,

рече Радев додавајќи оти овој став до последно го бранеле тој и бугарската дипломатија.

Претходно денеска осуда за нападот на клубот во Охрид стигна и од Министерството за надворешни работи на Бугарија од каде што инцидентот го оценија како тешко кривично дело. Поради тоа, како што информираат оттаму, денеска во Министерството ќе биде повикана амбасадорката на Северна Македонија во Бугарија Агнеса Руси-Поповска, на која ќе ѝ биде врачена протестна нота.

Македонската амбасадорка денеска ќе биде повикана во бугарското МНР поради нападот на клубот „Цар Борис Трети“ во Охрид

Вчерашниот оружен напад на бугарскиот клуб „Цар Борис Трети“ во Охрид е трет по ред. При нападот со оружје биле оштетени стаклото од надворешната врата и стаклото од излогот на канцеларијата.

(ВИДЕО) По трет пат оштетен бугарскиот клуб во Охрид

Пред два дена прозорците од просториите на клубот беа оштетени, а бугарските медиуми објавија и видеоснимки од безбедносните камери за време на нападот. Инцидентот се случил ноќта помеѓу 20 и 21 ноември меѓу 1 и 2 часот по полноќ, кога прозорците на просторијата биле искршени со камења, по што полицијата извршила увид.

(ВИДЕО) Бугарските медиуми објавија снимка од нападот на бугарскиот клуб „Цар Борис Трети“ во Охрид

Првиот напад на клубот, пак, беше непосредно по неговото отворање кога беше оштетена таблата на кое е испишано името на клубот.