На конференцијата „Европска перспектива за добрососедски односи меѓу Република Бугарија и Република Северна Македонија“ што се одржува под негово покровителство, а по повод 119 години од смртта на Гоце Делчев, бугарскиот претседател повтори дека интеграцијата на С Македонија во ЕУ не може да се случи без претходно да се гарантираат правата на Бугарите и да се запре говорот на омраза
Европската перспектива на Република Северна Македонија нема алтернатива и е стратегиска цел за бугарската држава. Сепак, интеграцијата на нашиот југозападен сосед не може да се случи без претходно да се гарантираат правата на Бугарите и да се запре говорот на омраза.
Ова го истакна претседателот на Бугарија, Румен Радев, денеска на отворањето на конференцијата „Европска перспектива за добрососедски односи меѓу Република Бугарија и Република Северна Македонија“.
Форумот е под покровителство на шефот на државата и се одржува на денот кога се одбележуваат 119 години од смртта на Гоце Делчев.
Како што јави БНТ, Радев посочил дека Бугарија сака да ги реши спорните политички прашања со Северна Македонија пред почетокот на преговорите за членство во ЕУ бидејќи во последните децении има многу случаи во меѓусебните односи во кои, како што рече, бугарската доверба не е оправдана од Северна Македонија.
„Промената на Уставот и внесувањето на Бугарите, заедно со другите народи кои ја градат државата, значи дека ја прифаќате европската идеја. Велат дека сега не можат затоа што немаат 2/3 мнозинство во парламентот да го одобри тоа. Извинете, но ако парламентот нема волја да ги исполни копенхашките критериуми за членство во ЕУ, каква е подготвеноста на нашиот сосед?“,
рече Радев.
Тој предупреди дека нерешавањето на политичките прашања меѓу двете земји ја блокира и размената во сите други области.
„Прекрасно е што енергичните нови премиери на двете земји презедоа иницијативи за градење пријателски односи, но сакам да видам распоред не само на економска и културна кохезија, туку и на решавање на политичките прашања. Затоа што ако не ги решиме нив, сите напори ќе одат во втор план“,
рече Радев.
Конференцијата е во организација на Институтот за историски истражувања при Бугарската академија на науките и Македонскиот научен институт. На неа освен Радев присуствуваат потпретседателката Илијана Јотова, истакнати историчари, дипломати, новинари, претставници на организации на Бугарите од С Македонија, како и претставници на Македонската патриотска организација во САД и Канада.
Освен обраќањето на Радев, кој го отвори форумот, ќе се одржи трибина на тема „Гоце Делчев и заедничката историја на Република Бугарија и Република Северна Македонија – меѓу фактите и идеологијата“.
На вториот панел на форумот учествуваат повеќе експерти меѓу кои и Ангел Димитров, копретседавачот со заедничката историска комисија, а темата е „Состојбата и перспективите на добрососедските односи: Европската зрелост на РСМ“.
Третиот панел е посветен на „100 години организирано движење на македонските Бугари низ светот“, на кој меѓу учесниците се и Георги Црномаров од Центарот за култура „Иван Михајлов“ од Битола и Петар Колев, претседател на Граѓанско демократска унија.