На средбата, како што пред нејзиниот почеток изјави членот на работната група од крилото на Таравари од Алијанса на Албанците, Азир Алиу, ќе се разговара за методологијата и динамиката на работа на овие групи. Поконкретни разговори на кои ќе биде начната и темата за кадровски решенија, најверојатно ќе се отворат на наредниот состанок, изјави тој одговарајќи на новинарски прашања
Работните групи што ВМРО-ДПМНЕ и коалицијата на опозициските партии на Албанците „Вреди“ ги договорија да ги водат преговорите за коалицирање за составот на идната влада попладнево ја одржуваат нивната прва средба.
Таа, како што јави МИА, се одржува во седиштето на ВМРО-ДПМНЕ.
На средбата, како што пред нејзиниот почеток изјави членот на работната група од крилото на Таравари од Алијанса на Албанците, Азир Алиу, ќе се разговара за методологијата и динамиката на работа на овие групи.
Покрај Алиу, работната група на „Вреди“ ја сочинуваат и Висар Ганиу од Демократското движење на Изет Меџити, Аднан Азизи од Движењето Беса на Билал Касами и Башким Муртези од Алтернатива на Африм Гаши.
Според информации на ВМРО-ДПМНЕ, што ги пренесува државната новинска агенција, членови на нивната работна група се потпретседателите на партијата Владо Мисајловски, Александар Николовски, Тимчо Муцунски и Гордана Димитриеска-Кочовска.
Поконкретни разговори на кои ќе биде начната и темата за кадровски решенија, најверојатно ќе се отворат на наредниот состанок, изјави Алиу одговарајќи на новинарски прашања.
Околу тоа дали се точни информациите дека бројот на пратеници на коалицијата „Вреди“ е можно да се зголеми, тој изјави дека засега станува збор за шпекулации.
Раководството на ВМРО-ДПМНЕ и лидерите на партиите од коалицијата „Вреди“ во саботата одржаа состанок на кој се договорија натамошните разговори за формирање на евентуална владина коалиција да се водат на ниво на работни групи сè до нивното финализирање.
На средбата пред пет дена, како што соопштија тогаш од ВМРО-ДПМНЕ, биле договорени општите начела за соработка за идната влада, која ќе се базира на три постулати – евроинтеграции, забрзан економски развој, како и борба против криминалот и корупцијата и владеење на правото.
Од страна на ВМРО-ДПМНЕ, тогаш на состанокот покрај лидерот Христијан Мицкоски беа присутни потпретседателите на партијата – Александар Николоски, Владо Мисајловски, Тимчо Муцунски и Гордана Димитриеска-Кочоска, како и шефот на кабинетот на претседателот Владимир Нелоски, додека од страна на „Вреди“ беа присутни Арбен Таравари, Изет Меџити, Билал Касами и Африм Гаши.
Според првичните официјални резултати од парламентарните избори што ги објави Државната изборна комисија ВМРО-ДПМНЕ со коалицијата „Твоја Македонија“ оствари апсолутна победа и во идниот состав на Собранието би требало да биде застапена со 58 пратеници, додека коалицијата „Вреди“ на опозициските партии на Албанците ќе има 13 пратенички мандати.