Рускиот претседател предложи Москва да спроведе сопствена истрага на остатоците од дронот за, како што рече, објективно да го утврди потеклото на беспилотното летало
Рускиот претседател Владимир Путин рече дека е прерано да се каже дека дронот што се урна во Романија е руски, сугерирајќи дека можеби е лансиран од Украина.
„Кој во Романија вели дека ова е руски дрон? Никој не може да каже какво е потеклото на дронот додека не се спроведе истрага. Украински дронови претходно беа забележани во Финска, Полска и балтичките држави, а првата реакција беше потполно иста како оваа во Романија: ‘Русите доаѓаат’. Потоа се утврди дека не се руски дронови“,
рече Путин на прес-конференција.
Рускиот претседател предложи Москва да спроведе сопствена истрага на остатоците од дронот за, како што рече, објективно да го утврди потеклото на беспилотното летало.
„Доколку ни дадат какви било објективни податоци, како што еднаш им дадовме на анализа, да речеме, информации и остатоци од беспилотни летала на претставници на американската администрација, нека ни ги предадат, а ние ќе спроведеме објективна истрага. Дури тогаш ќе процениме што се случило“,
додаде тој.
Претходно денеска Романија го прогласи за „персона нон грата“ рускиот конзул во југоисточниот романски крајбрежен град Констанца и му наложи да ја напушти земјата откако, како што објавија романските власти, руски дрон се урна врз станбена зграда во градот Галац за време на синоќешниот напад на Москва врз Украина.