Спасовски дополни дека за лицето ќе биде издадена меѓународна потерница
Првоосомничениот за убиството на 14-годишната Вања побегнал прво во Белград, а потоа во Бугарија, изјави министерот за внатрешни работи Оливер Спасовски одговарајќи на новинарско прашање на денешната прес-конференција на која беа изнесени детали за случајот со грабнувањето и убиството на девојчето.
Рече дека ја напуштил државата со автомобил.
„Тоа лице заедно со неговиот адвокат на 30 ноември заминало во Белград, а потоа следниот ден во Бугарија“,
рече Спасовски.
Посочи дека против осомничениот претходно имало поведени неколку прекршочни постапки.
„За една постапка која беше на територија на ОВР Прилеп има покренато и кривична пријава“,
додаде министерот.
Спасовски дополни дека за лицето ќе биде издадена меѓународна потерница.
Јавниот обвинител на ОЈО Скопје, Гаврил Бубевски, денеска прецизира дека првоосомничениот, кој е во бегство, е организатор и реализатор на двете убиства.
Ниту министерот Спасовски ниту Обвинителот Бубевски не го спомнаа името и презимето на првоосомничениот за убиствата ниту, пак, имињата на другите осомничени лица.
Сепак, дел од медиумите уште синоќа, според неофицијални и непотврдени информации, објавија дека првоосомничен за двете убиства е скопјанецот Љ.П.