Со звуците на европската химна „Ода на радоста“, старо-новиот претседател Емануел Макрон пристигна под Ајфеловата кула, придружуван од неговата сопруга Брижит и децата, како симбол на неговата програма за новиот петгодишен мандат кој сака да биде во знакот на децата. На почетокот од неговото обраќање, тој им се заблагодари на сите ние кои гласаа за него.
„Сакам да им се заблагодарам на сите активисти, волонтери, сопатници и избрани функционери кои ме придружуваа од самиот почеток. Знам дека сите работевте напорно. Вистината доаѓа со чукање во срцето, а јас знам што ви должам. Сакам да им се заблагодарам на сите Французинки и Французи кои ми ја дадоа довербата за да го реализираме нашиот проект за понезависна, посилна Франција, да се осигураме дека проектите ќе се реализираат и да ја направиме Франција голема еколошка нација“,
рече Макрон.
Макрон притоа нагласи дека тој не е повеќе кандидат на еден табор, туку претседател на сите Французи.
„Знам и дека многу сонародници гласаа за мене, за да ги блокирам идеите на крајната десница. Сакам да им се заблагодарам и да им кажам дека сум свесен дека овој глас ме врзува за годините што доаѓаат. Јас сум чувар на нивната приврзаност кон Републиката. Мислам и на сите наши сонародници кои апстинираа, нивниот молк значеше одбивање да изберат, на што мора да одговориме ние“,
рече реизбраниот претседател.
Меѓу другото, Макрон истакна дека годините кои доаѓаат нема да бидат мирни.
„Војната во Украина е тука, за да не потсети дека Франција мора да го крене гласот за да ја покаже јасноста на своите избори и да ја покаже својата сила во сите области“,
истакна Емануел Макрон на Шан-де-Марс.