Во Италија за само едно деноноќие е потврдена смртта на 41 лице како резултат на коронавирусот. Ова досега е најголемата бројка на починати во еден ден од оваа болест во Италија. Со последните информации досега таму починати се вкупно 148 лица, а порасна и бројот на заразени за 769 лица или вкупно 3858.
Во Велика Британија пак, денеска е регистриран првиот смртен случај од коронавирус, јавуваат тамошните медиуми.
Еден повозрасен пациент со лоша здравствена состојба почина откако беше позитивен на тестот на коронавирус, а се претпоставува дека се заразил во Велика Британија.
Ова е прв смртен случај во Британија од коронавирус, по смртта на британскиот државјанин на 28 февруари на бродот „Дајмон Принцес“, кој се наоѓаше во карантин во близина на јапонското пристаниште Јокохама.
Италијанските власти пак, од вчера одлучија да ги затворат сите училишта и факултети до 15 март со цел да се стопира ширењето на коронавирусот, информираше министерката за образование Луција Азолина, а пренесе новинската агенција Анса.
Се затвораат и киносалите и театрите, а се забрануваат и јавни настани во целата земја. Заразата, таму се појави пред 14 дена, главно во северниот дел на Италија, меѓутоа, во моментов заболени лица има во сите 20 италијански региони.
Со новиот коронавирус досега се заразиле 96.779 лица, а моментниот број изнесува 39.499, од кои 84 отсто (33.078) имаат полесен облик на болеста, а 16 отсто (6.421) се наоѓаат во критична состојба.
Смртноста од коронавирусот (Ковид-19), според извештаите на Светската здравствена организација, е 3,4 проценти, а проширен е на територијата на 87 држави.
Земјата во која има најголем број заразени е Кина, каде од последиците на коронавирусот починаа 3.013 луѓе. Според бројот на инфицирани од Ковид-19 на второ место се наоѓа Јужна Кореја, потоа Иран, а во Европа најмногу заболени има во Италија.