Што треба да преземат функционерите пред, за време и по патувањата во странство како дел од работните обврски
Владата денеска го објави протоколот за патување на избрани носители на јавни функции надвор од државата, кој е дел од втората фаза од планот за намалување на рестриктивните мерки за спречување на ширење на коронавирусот.
Во него се содржани препораки и упатства кои треба да се преземат пред, за време и по враќање од патувањето кое е дел од работните обврски од државен интерес.
При излез од државата носителите на јавни функции задолжително потпишуваат изјава за доследно придржување кон пропишаните основни превентивни мерки за време на престојот во странство кои предвидуваат:
• Носење заштитна маска со избегнување на допирање на лицето (очи, нос, уста) со рацете;
• Често миење на рацете или дезинфекција на рацете за време на престојот надвор од државата;
• Одржување физичко растојание од 1,5 до 2,0 м и намалување на физички контакти (се забранува поздравување со раце).
• Се препорачува да не се користи јавен превоз и такси во местото на престој.
По враќањето во земјата, ќе се спроведуваат одредени превентивни мерки во период од 14 дена од денот на влегувањето во државата. Во тој период, според протоколот, се препорачува:
• Не е потребно спроведување на тестирање за КОВИД-19;
• Носење заштитна маска во затворен простор, а доколку се движи на јавни места и површини од отворен тип и целосно го одржува дозволеното минимално растојание од најмалку два метри од друго лице, маска не е задолжителна со внимателно избегнување на допирање на лицето со рацете ;
• Да се ограничат на минимум личните и професионални контакти со други лица од нивната околина и надвор од неа;
• При евентуален контакт со други лица задолжително е носење на заштитна маска
• Должни да се придржуваат кон упатствата за намалување на ризикот од пренесување на инфекцијата;
• Често миење на рацете или нивна дезинфекција
• Избегнување физички контакт и одржување дистанца од најмалку од 1,5 до 2,0 м при контакт лице в лице.
Исто така, се препорачува мерење на телесната температура наутро, и доколку е поголема од 37,2 °C или ако лицето има симптоми (треска, отежнато дишење, сува надразнителна кашлица) да го контактира телефонски својот матичен лекар или ја известува регионалната епидемиолошка служба (на постоечките телефони за контакт на ИЈЗ и ЦЈЗ) кои ќе одлучат за понатамошниот третман.
Доколку состојбата бара итна хоспитализација се повикува итна медицинска помош или со сопствено возило во придружба на еден член на семејството ја посетува најблиската ковид-болница, со претходна најава по телефон.
Овој протокол е дел од Планот за намалување на рестриктивните мерки за спречување на ширење на коронавирусот, усвоен на вчерашната владина седница.
*Поврзани вести
Филипче денеска во Грција на средба за координирање на идните мерки против ковид-19
Спасовски: Граѓаните не се дискриминирани со одредбата функционери да може да патуваат