Демонстрантите во Мјанмар, револтирани од минатонеделниот воен удар, ги продолжија масовните протести низ целата земја, и покрај блокадите на патиштата и забраната за масовни собирања.
Револтираните граѓани скандираа пароли против воената власт и ѝ се спротивставија на полицијата, која користеше водени топови и ги растури нивните протестни собири.
Британските медиуми пренесуваат дека по воениот удар од 1 февруари и приведувањето на најпопуларната политичка лидерка во земјата, премиерката Аунг Сан Су Чи, граѓаните четири дена по ред протестираа низ оваа јужноазиска земја со околу 53 милиони жители, а бранот граѓанска непослушност се прошири во болниците, образовните институции и меѓу владини претставници.
„Ние ќе ја продолжиме нашата борба. Ветуваме целосен колапс на диктатурата и го повикувам военото раководство да ги ослободи сите политички затвореници“,
рече активистот Маунг Саунгка.
Демонстрантите одбиваат да се повлечат и да се разотидат иако полицијата во главниот град Најпиди во изминатите два дена користеше водени топови против нив.
Ветувањата на лидерот на војската Мин Аунг Хленг дека евентуално ќе дозволи нови избори, предизвика презир кај демонстрантите бидејќи ги повтори неоснованите обвинувања за наместени избори, на кои минатиот ноември победи партијата на Демократската лига, на Аунг Сан Су Чи.