Транспортерите реагираат на новите мерки за копнените граници воведени во понеделникот
Воведување временско ограничување за влез на камиони од „Евзони“ меѓу 7 и 19 часот, како и целосниот недостиг на организација во процесот на спроведување на брзите тестови од екипите на Националната организација за јавно здравје на Грција на сите што влегуваат во земјата, предизвика хаос и огромни доцнења, а колоните камиони достигнуваат и до десет километри, велат од Федерацијата на грчките камионџии во соопштение во кое ги повикуваат транспортерите денеска на протест на граничниот премин „Евзони“, јави МИА од Атина.
Транспортерите, кои уште во понеделникот најавија дека се подготвени да се мобилизираат и да го блокираат граничниот премин од грчка страна ако не се исполнат нивните барања, истакнуваат дека ситуацијата на една од главните копнени порти за влез во земјата веќе четири дена е исклучително тешка и дека има големи проблеми во протокот на стоки и во грчкиот извоз.
„Возилата што пренесуваат медицинска опрема, лесно расиплива, како и секаков вид стока, се принудени да чекаат и до 12 часа за да влезат во Грција поради неможноста на државата да преземе соодветни мерки за ограничување на ширењето на коронавирусот, без да се спречува нормалното функционирање на синџирот на снабдување“,
велат од Федерацијата во соопштението за денешниот протест.
Грчките камионџии реагираат на новите мерки за копнените граници воведени во понеделникот. Преку писмо до Министерството за транспорт и врски и Министерството за развој на Грција, бараат граничните „Евзони“ и „Какавиа“ да бидат отворени за транспортерите 24 часа и да има дополнителен персонал од Националната организација за јавно здравје кои ги вршат брзите тестови, за да се забрза целата процедура.