Утрово во Прилеп приведена е инспекторка за земјоделство, соопшти МВР. Според полициското соопштение, таа била фатена на лице место како прима поткуп од 64 000 денари (околу 1 000 евра).
Приведувањето се случило во угостителски објект.
„Денеска (18.03.2022) во 9:30 часот, во угостителски објект во Прилеп, полициски службеници од Надворешната канцеларија за криминалистички работи Прилеп ја лишиле од слобода В.В. – земјоделски инспектор во Државен инспекторат за земјоделство поради постоење основи на сомнение за сторено кривично дело примање поткуп по член 357 од Кривичниот законик. Таа била затекната при примање поткуп од 64 000 денари од лице од Прилеп, по што веднаш била лишена од слобода, а парите ѝ биле одземени. В.В. била приведена во полициска станица“,
велат од МВР.
Оттаму најавуваат дека по целосно документирање и расчистување на случајот против неа ќе биде поднесена и пријава.