Притвор на кумановецот што чувал забрането оружје кај Арачиново, Обвинителството работи на идентификување на другите лица во случајот

Притворот, велат од ОЈО Скопје, е побаран поради опасност од бегство откако бил приведен на 29 декември на граничниот премин „Долно Блаце“ при обид да излезе од државата, а дополнително обезбедените материјални траги упатуваат дека имал соучесници, па би можел да влијае врз нив доколку се брани од слобода

На барање на Основното јавно обвинителство (ОЈО) Скопје, скопскиот кривичен суд му определи 30-дневен притвор на 29-годишниот кумановец кој заедно со други, засега непознати лица, криел поголемо количество оружје и муниција во канал покрај локалниот пат меѓу селата Орланци и Никуштак.

Притворот, велат од ОЈО Скопје, е побаран поради опасност од бегство откако бил приведен на 29 декември на граничниот премин „Долно Блаце“ при обид да излезе од државата, а дополнително обезбедените материјални траги упатуваат дека имал соучесници, па би можел да влијае врз нив доколку се брани од слобода.

Во врска со случајот поради кој е приведен осомничениот 29-годишник, од Обвинителството посочуваат:

„Полицијата, на 18 декември, покрај коловозната лента до пластичен столб за светлосна сигнализација означен со лименка, пронашла пушкомитралез, десетина автоматски пушки, рамки и поголем број куршуми кои на граѓаните им се забранети и за чие поседување цивилните лица не можат да добијат дозвола.“

• Полицијата го расчистила случајот со пронајденото оружје во Арачиново, притворен е 29-годишен кумановец

Обвинителството информира оти е поведена истрага против кумановецот и дека се работи на идентификација на неколку други лица со кои тој недозволено го држел оружјето на оваа локација, за што, како што посочуваат, постојат материјални траги за основаното сомнение.