Бугарскиот претседател вчера се сретна со претседателката на Европската Комисија, Урсула фон дер Лајен, со која разговарал за Северна Македонија, јавија вчера бугарските медиуми
Бугарскиот претседател Румен Радев, пред почетокот на вториот ден од Самитот на ЕУ во Брисел, кој е посветен на борбата против ковид-19 и климатските промени, изјави дека за Бугарија приоритет е споделувањето на вакцините со Северна Македонија и регионот, јави МИА од Брисел.
„Ќе разгледаме механизмот за споделување вакцини од држави членки кон трети земји, за Бугарија приоритет е Западниот Балкан со Северна Македонија на врвот“,
изјави Радев.
Бугарскиот претседател вчера се сретна со претседателката на Европската Комисија, Урсула фон дер Лајен, со која разговарал за Северна Македонија, јавија вчера бугарските медиуми.
Тој вчера вечер пред почетокот на Самитот на ЕУ порача дека од неговите колеги ќе побара солидарност и разбирање за специфичностите на секоја земја членка.
Во земјава веќе пристигнуваат вакцини кои ЕУ ги обезбедува како помош преку трилатерални договори во рамките на програмата „Тим Јуроп“ (Team Europe), програма што ја координира Австрија.
Во меѓувреме, Медицинскиот центар „Комак медикал“ со помош на повеќе бугарски министерства и Царинската агенција, од минатата недела започна со вакцинирање против ковид-19 на граѓани од Северна Македонија на граничните пунктови Станке Лисичково – Делчево и Златарево – Ново Село на бугарско-македонската граница.
Оние што сакаат да се вакцинираат ќе можат да го сторат тоа само по претходна резервација на телефон: +359 886 800 264 (Viber) и +359 882 516 981 (Viber). Откако ќе изјават желба за вакцинирање на овие телефони, тим на „Комак медикал“ ќе контактира со луѓето за конкретен датуми и време за вакцинирање.
Кампањата започна по одобрение добиено од поранешната бугарска влада на Бојко Борисов.