Привремената Влада на Бугарија е подготвена да води активен дијалог со Република Северна Македонија, како и да разговара за можностите за забрзување на процесот на европската интеграција, порачал бугарскиот претседател Румен Радев на средбите со претседателката на Европската комисија, Урсула фон дер Лајен и со премиерот на Португалија, Антонио Коста денеска во Брисел. Како што стои во соопштението на кабинетот на Радев, тој додал сепак напредокот во процесот на европската интеграција треба да се заснова на почитување на човековите права и целосно почитување на копенхашките критериуми за членство во Унијата. На средбата како што се наведува, главна тема биле можностите за напредок во усвојувањето на рамката за преговори и отворањето на преговорите за членство во Европската унија од страна на Република Северна Македонија
„Потребни ни се позитивни примери во билатералните односи меѓу Бугарија и Северна Македонија и директен и отворен билатерален дијалог за решавање на проблемите. Секоја можна одлука за започнување преговори за членство во ЕУ со Република Северна Македонија ќе биде внимателно анализирана и усогласена со декларацијата на бугарскиот Парламент и рамковната позиција на нашата земја за проширувањето на ЕУ и процесот за стабилизација и асоцијација од октомври 2019 година“
изјавил Радев.
Бугарскиот претседател го оценил како добар знак претстојното заедничко одбележување на светите браќа Кирил и Методиј од страна на делегациите на Бугарија и Република Северна Македонија во Рим и повика на политичка волја од Северна Македонија за постигнување конкретни резултати.