Пратеникот на ВМРО-ДПМНЕ е третообвинет и се товари за делата измама и за злоупотреба на службената положба и овластувања
Предметот се однесува на продажба на имот (зграда од 157 квадратни метри и дворно место од 3 920 квадратни метри) во село Ижишта, сопственост на Општина Македонски Брод
Основниот кривичен суд во Скопје предмалку информираше дека во целост е прифатено обвинението за предметот „Моќник“, со кое се обвинети пратеникот на ВМРО-ДПМНЕ, Антонијо Милошоски и уште 12 други лица.
Сега предметот, според електронскиот АКМИС, ќе се распореди кај судија, кој ќе треба да го закаже рочиштето за старт на судскиот процес.
Пратеникот е третообвинет и се товари за делата измама и за злоупотреба на службената положба и овластувања.
Прво и второобвинет за измама, пак, се таткото на Милошоски и поранешниот градоначалник на Македонски Брод, Милосим Војнески. Другите десетмина опфатени со обвинителниот предлог се претседателот на поранешната Комисија за лустрација Томе Аџиев и девет члена на Комисијата. Тие се обвинети за злоупотреба на службената положба.
Предметот се однесува за продажба на имот (зграда од 157 квадратни метри и дворно место од 3 920 квадратни метри) во село Ижишта, кој бил во сопственост на Општина Македонски Брод, а го користела Општина Пласница. Имотот бил продаден на таткото на пратеникот. Штетата што ѝ е направена на Општина Македонски Брод и на државниот буџет, според обвинителството, е околу 50 000 евра.
„Во текот на 2011 година прво и второобвинетиот, заеднички, со намера првообвинетиот да прибави противправна имотна корист, ги довеле во заблуда советниците во Советот на Општина Македонски Брод, со лажно прикажување и со прикривање факти за правниот статус и вистинската вредност на недвижностите – предмет на продажба. Тие ги навеле советниците да изгласаат одлука за отуѓување на недвижен имот за кој советниците сметале дека е ’поранешниот задружен дом‘, а всушност одобриле отуѓување на зграда и дворно место во село Ижишта – Македонски Брод, која ја користела Општина Пласница. Со продажбата на објектот ѝ нанеле штета на Северна Македонија во значителна вредност од 1 795 800 денари (околу 30 000 евра) и за продажбата на земјиштето ѝ нанеле штета на општината Македонски Брод во значителна вредност од 1 176 000 денари (речиси 20 000 евра)“,
рекоа од ОЈО Скопје кога на 24 август го поднесоа обвинението.
Според Обвинителството, пратеникот Милошоски, искористувајќи ја својата позиција, вршел континуиран притисок врз државните органи, Државното правобранителството и судовите, за да не ја поништат продажбата на имотот.
Како течела продажбата?
Во соопштението што го објави Обвинителството по поднесувањето на обвинението во август, беше опишано како дошло до продажбата на имотот. Така, според ОЈО Скопје, на 27 октомври 2011, таткото на Милошоски писмено побарал од Советот на Македонски Брод да донесе одлука да се продаде задружниот дом во Ижишта и лажно навел дека тој веќе го користи просторот и сака да го купи за да отвори сопствен бизнис. Иако, тврди Обвинителството, знаел дека објектот е всушност делот што не го користел тој, туку градоначалникот и администрацијата на Пласница и Управата за водење на матичните книги.
Веќе наредниот ден Советот на Македонски Брод одржал седница на која го разгледал барањето. На седницата зборувал тогашниот градоначалник и, како што тврди Обвинителството, лажно презентирал дека станува збор за објект што претходниот општински совет му го дал на користење на таткото на Милошоски на 30 години, за што тврдел дека има и договор. За да може да се вложува во објектот, градоначалникот побарал советниците да одлучат да му се продаде објектот преку јавна лицитација.
Советниците, кои биле доведени во заблуда, пишуваше во обвинението, едногласно донеле одлука за отуѓување на зградата и во апсолутна заблуда му овозможиле на градоначалникот да започне со постапката за продажба на објектот и дворното место. Градоначалникот понатаму, за да избегне конкурентност во наддавањето и да не се јави друг купувач, не го ни објавил огласот во „Службен весник“.
„Како наддавач се пријавил само првообвинетиот, кој единствено знаел за денот на јавното наддавање и го купил објектот кој бил сопственост на државата за цена од 1 795 800 денари, што е 670 денари повеќе од почетно определената за наддавањето. Парите биле уплатени на сметка на Општина Македонски Брод, а со второобвинетиот склучиле договор за купопродажба, кој како сопственик на објектот подоцна успеал во катастар да го впише објектот на свое име, како наводна техничка исправка, иако немал основа за такво впишување. Тој го купил и земјиштето по цена од 100 денари по м2, во постапка без јавно наддавање. Имено, иако според одлуката на Советот на општината најниска (почетна) цена во постапката за јавно наддавање за предметното земјиште требало да биде 100 денари по м2, и истата била објавена во службен гласник на Општина Македонски Брод, па сепак донесена е одлука со ист евиденциски број, со која цената на земјиштето се ограничува да не биде поголема од 100 денари по м2“,
наведоа од Обвинителството.
Тоа, тврдеа оттаму, го искористиле таткото на Милошоски и тогашниот градоначалник и постигнале договор за купопродажба на земјиштето по цена од 100 денари по квадратен метар, додека реалната вредност определена со актите на Општината за тој регион била предвидена на 400 денари.
Која била улогата на Лустрациската комисија?
Откако се случила продажбата, градоначалникот на Пласница (чија општина го користела објектот) го контактирал пратеникот и побарал од тогашната влада на ВМРО-ДПМНЕ да ја испита постапката за продажбата.
„Владата оформила комисија, но, третообвинетиот, искористувајќи ја својата позиција на пратеник од владејачката партија, вршел континуиран притисок врз сите институции кои постапувале по овој предмет, за да остане во правна сила незаконитата продажба на објектот и земјиштето. Третообвинетиот паралелно со притисокот врз надлежните за непреземање активности за преиспитување на продажбата во име на претседател на комисијата за надворешна политика, преку писмени барања, иницирал инспекциски и полициски контроли врз едно правно лице, а организирал друго лице да поднесе барање до Комисијата за утврдување на фактите (Комисија за лустрација) со наводи кои треба да иницираат постапка за лустрација против судија“,
посочија од ОЈО Скопје.
Милошоски, според Обвинителството, го поттикнал претседателот на Лустрациската комисија, Аџиев, да отвори постапка за судија. Кога беше отворена истрагата „Моќник“, беше посочено дека станува збор за судија за кој се сметало дека е близок на градоначалникот на Пласница и може да го штити во судска постапка, па затоа била иницирана неговата лустрација.
Комисијата ја отворила постапката и Аџиев и деветмина члена на Лустрациската комисија, според ОЈО Скопје, иако не биле исполнети критериумите, донеле одлука да го лустрираат судијата кој бил времено оддалечен од вршење на функцијата судија во Основниот суд Кичево, а потоа и разрешен.
Кога беше поднесено обвинението од ВМРО-ДПМНЕ реагираа дека станува збор за политички прогон со оглед дека Милошоски е нивни пратеник.