Од ССМ бараат итна седница на Управниот одбор кој како второстепен орган во претпријатието е надлежен да одлучува по приговори и жалби и да се укине решението за изрекување на дисциплинска мерка – престанок на работен однос
Сојузот на синдикати на Македонија денеска објави дека претседателот на синдикалната организација на „Водовод и канализација“ Стојанче Кашиковски добил отказ од страна на в.д. директорот на претпријатието Марјанче Митовски.
Од ССМ, ваквата постапка на в.д. директорот ја оценуваат како спротивна на закон и на колективниот договор.
„Согласно Закон и колективен договор на претседателот на синдикат не може да му се даде отказ, особено поради тоа што во моментот се спроведува постапка за штрајк и ваквиот притисок е порака за работниците да бидат послушници на Митовски, кој веќе и им испраќаше и заканувачки пораки на сите работници кои сега се остваруваат и покрај предупредувањето од Синдикатот СУТКОЗ при ССМ што беше и едно од главните барања за разрешување на в.д директорот“,
се вели во соопштението од ССМ.
Од таму додаваат дека со давањето отказ на претседателот на синдикатот Кашиковски, нема кој да го спречи Марјанче Митовски во остварување на неговите лоши мисли, опасни по безбедноста на изворите од кои се снабдува со вода градот и граѓаните на Скопје, а за што синдикатот јавно предупредуваше дека ќе се случи, а сега со активностите на в.д директор и се потврдува тоа.
„Отказот е даден поради тоа што конфликтниот Митовски лошо смислил дека работникот Стојанче Кашиковски е должен да извршува работни задачи и обврски за време на годишен одмор, а единствено одговорно лице кај правното лице согласно Статутот на ЈП ‘Вододовод и канализација’ Скопје за извршување на тие задачи бил токму Митовски во својство на в.д директор“,
додаваат од ССМ.
Од ССМ бараат итна седница на Управниот одбор кој како второстепен орган во претпријатието е надлежен да одлучува по приговори и жалби и да се укине решението за изрекување на дисциплинска мерка – престанок на работен однос. Од Управниот одбор бараат да утврди и зошто Митовски не ги спроведува нивните одлуки.
Синдикатот, додаваат од таму, поради тоа што не може да ја најде градоначалничката Арсовска ќе ја пречека на одбележување на денот на ослободувањето на градот Скопје каде што ќе се појави и пред целокупната скопска и македонска јавност ќе побара одговорност од неа и нејзините лични соработници – осуденици со дијагнози од невропсихијатар.