Во фокусот на активностите на МАНУ, како што рече Љупчо Коцарев, ќе бидат и прашањата и проблемите на евроатлантскиот интеграциски процес на земјава, за што ќе се интензивира соработката со СЕП
Активностите на МАНУ во 2020 година ќе бидат насочени кон изработка на научно-фундирани документи за најгорливите прашања поврзани со сегашноста и со иднината на државата, кои ќе бидат корисни и за креаторите на политиките, најави денеска новиот претседател на Академијата, Љупчо Коцарев.
На годишното собрание на МАНУ, Коцарев рече дека меѓу тие прашања спаѓаат: климатските промени, демографијата, урбанизацијата, економскиот раст, потрошувачката на енергија, како и геополитичките теми за кои се навестуваат нови аспекти и тенденции во светот.
„Без разлика на недоразбирањата што ги имавме со БАН во 2019 година, МАНУ во 2020 ќе ги преземе неопходните чекори, како иницијативи, дијалог, приоритети, проекти… за да се хармонизира соработката, но и да се продлабочи соработката со другите академии во соседните држави“,
истакна Коцарев соопштувајќи дека од вкупниот број на научноистражувачки проекти на МАНУ во оваа година, 30 се билатерални, односно ќе се реализираат токму во соработка со БАН, САНУ и со Унгарската академија на науките. Осум проекти се меѓународни и финансирани од европските фондови и од други меѓународни институции и фондации.
Во фокусот на активностите на МАНУ, како што рече, ќе бидат и прашањата и проблемите на евроатлантскиот интеграциски процес на земјава. Во таа насока, Академијата годинава ќе ја интензивира соработката со Секретаријатот за европски прашања и со други владини ресори и тела, со цел активно да учествува во давање сугестии, забелешки и предлози при конципирањето и подигањето на квалитетот на документите кои се од посебно значење за развојот на земјата, а во тие рамки и за евроатлантскиот интеграциски процес.
Академијата ќе се посвети и на интеркултурализмот и, како што рече Коцарев, ќе ги третира различностите како предност, ќе предлага кохезивни решенија и ќе сугерира заеднички културни наративи. Во фокусот на МАНУ ќе биде и образованието за кое рече дека е клучен предуслов и за демократијата. Образованието, посочи Коцарев, е во криза поради глобалните реформи и додаде „за жал, на повидок нема решение“.
Експозето го заврши со укажување дека сите ние треба да го најдеме излезот од трите заробени ентитети – заробениот ум, заробената држава и заробената цивилизација.
„Се надевам, а јас ќе направам сè што е во моја моќ, МАНУ да игра клучна улога во потрагата по излез од заробеноста на современиот свет, овде и пошироко“,
истакна претседателот на МАНУ .