Бура од реакции предизвика заклучокот на Бугарската академија на науките (БАН) дека македонскиот јазик е дијалект на бугарскиот јазик. Од Владата на С.Македонија за „360 степени“ велат дека Договорот за добрососедство кој двете земји го потпишаа во 2017, е на официјалните јазици од двете договорни страни (македонски и бугарски) и таму е нагласено дека двата текста имаат еднаква важност. Владата ја повикува бугарската страна да го почитува договореното.
„Апелираме на соодветното и единствено можно читање и почитување на Договор за пријателство, добрососедство и соработка меѓу двете земји. Уште еднаш потсетуваме дека двете земји се обврзаа да споделуваат заеднички ставови против говор на омраза, национализам или какви било провокации во двете држави, а кои отскокнуваат од духот на Договорот, со кој минатото и историјата, ги поставивме како темел на заедничката иднина“, стои во одговорот од Владата за „360 степени“.
Оттаму додаваат дека посебноста на македонскиот јазик е признаен и од Обединетите Нации каде што покрај името Република Северна Македонија, за јазик стои: македонски јазик.
ЗАЕВ: OЧЕКУВАМ ПРИЈАТЕЛСКА БУГАРИЈА ДА ГО НАДМИНЕ ОВА ПРАШАЊЕ
Денеска и премиерот Зоран Заев изјави дека ќе има реакција по ставот на БАН.
„Ќе реагираме поради тоа што тоа прашање е дел од прашањето за решавање на проблемите помеѓу Република Северна Македонија и Бугарија во Договорот за добрососедство и пријателство. Првите чекори се направени. Верувам дека тоа мораме да го решиме. Јас не ја знам реакцијата, сега ја слушам од вас. Секако ќе реагираме и преку МНР и ќе ги направиме сите наши коментари откако ќе прочитаме што е самата реакција… Очекувам пријателска Бугарија да го надмине ова прашање“, изјави Заев.
Со реакција на социјалните мрежи се јави и министерот за надворешни работи, Никола Димитров.
„За овој процес да успее, на двете страни им треба мудрост и деликатност, големина во разбирањето и почитувањето на грижите и достоинството на другиот. Лесно е да се растури, тешко е да се гради“, пишува Димитров на Фејсбук.
Заклучокот од БАН следеше по Собранието на Македонската академија на науките и уметностите (МАНУ), кои на 3. декември усвоија Повелба за македонскиот јазик во која ги изнесува научно признатите факти за македонскиот јазик.
Ставот на Бугарската академија на науките (БАН) e дека македонскиот јазик „не постои“, т.е. дека е „писмено-регионална норма на бугарскиот јазик“.
По ставот на БАН, реагираше и Институтот за македонска литература, според кои со негирање на македонскиот идентитет се врши негирање на македонскиот национален идентитет.
ТАКИ ФИТИ: СТАВОТ НА БАН НЕ ГО ПОДДРЖУВААТ СИТЕ БУГАРСКИ АКАДЕМИЦИ
Сепак, актуелниот претседател на МАНУ, академик Таки Фити, вели дека има информации оти не сите академици на БАН го поддржале ставот со кој излезе Бугарската академија.
„Имаме одлични односи со Бугарската академија. Тој документ излезе таков каков што излезе, но јас имам и други информации дека не сите академици на БАН го поддржале тоа. Тука има инволвирање на државната бугарска политика во овие работи, што не е во ред. Нема да ги расипеме односите со БАН, ќе разговараме, ние сме се договориле дека нема прашања за кои не може да разговараме, дури и за најсензитивните“, изјави денеска академик Фити пред почетокот на одбележувањето на 100-годишнината од раѓањето на академик Ксенте Богоев.
Негирањето на македонскиот јазик е само дел од несогласувањата на релација Софија – Скопје. Заглавена е и работата на заедничката македонско-бугарска Комисија за историски и образовни прашања кои „запнаа“ на прашањето: Чиј е Гоце Делчев?
Претседателот на македонскиот тим од експерти во мешовитата комисија, Драги Ѓоргиев, во изјава за Дојче Веле, денеска посочува дека ваква атмосфера владеела и за време на состаноците на Комисијата. Тврди дека неговите бугарски колеги во разговорите избегнувале во историска смисла да ги користат термините „македонски јазик“, „македонска нација“, „македонска култура“.
Досега, Владите на С.Македонија и на Бугарија веќе ги усвоија препораките на Комисијата за заедничко чествување на Цар Самоил, браќата Кирил и Методиј, Свети Климент и Свети Наум.