Филипинскиот претседател Родриго Дутерте изјави дека невакцинираните граѓани ќе бидат уапсени доколку не ги почитуваат мерките за задолжителна изолација, пренесува Ројтерс.
„Доколку некој не ја почитува мерката задолжителна изолација, ако излезе од дома и ја посетува заедницата, ќе биде задржан. Полицијата има овластување да ги апси непослушните граѓани“,
рече Дутерте во телевизиско обраќање.
Министерството за здравство на оваа азиска земја соопшти дека дневните инфекции со коронавирусот на Филипините денеска достигнаа највисоко ниво со 17 220 случаи.
„Јас сум одговорен за безбедноста и благосостојбата на секој граѓанин на Филипините“,
рече Дутерте и додаде дека секој што не ја одобрува неговата политика може да поднесе тужба против него.
На Филипините, според податоците од крајот на минатата година, целосно се вакцинирани 49,8 милиони луѓе или 45 отсто од 110 милиони жители.
Бидејќи државата бележи зголемен број случаи на инфекција со коронавирус, здравствените експерти предупредуваат дека тоа би можело да изврши притисок врз здравствениот систем.
На Филипините досега се потврдени 43 случаи на коронавирус од сојот омикрон, што ја натера владата да ги заостри рестриктивните мерки претходно оваа недела, потсетува британската агенција Ројтерс.