Илир Мета, исто така, им се заканил на полицајците, кои асистирале за иселување на ФРД од објект на општината, дека лично ќе ги однесе во затвор
Албанскиот претседател Илир Мета влегол денес во насилен судир со полицијата, во седиштето на партијата Нов демократски дух(ФРД). Како што јавуваат тамошните медиуми, полицијата била таму за да асистира за иселување на партијата од објект во сопственост на локалната самоуправа.
Сосема неочекувано, претседателот Мета насилно се судри со полициските службеници во просториите на ФРД, која е дел од опозицискиот блок. Дури и се закани дека ќе ги стави во затвор, јави Топ чанел телевизија.
„Излезете надвор, не правете проблеми, зошто ја малтретирате опозицската партија? Ви кажувам дека јас ќе ве однесам во затвор со свои раце“,
им се заканил Мета на крајно изненадените и револтирани полицајци, наведува телевизијата.
Како причината за конфликтот се посочува тоа што раководството на ФРД одбило да ги испразни канцелариите, како што барала општината,с о образложение дека објектот е амортизиран.
Агенцијата „Балкан веб“ објави дека Мета дошол во седиштето на партијата по повик од нејзиниот претседател Сали Шеху.
„Претседателот Мета апелираше до градоначалникот на Тирана Ерион Велиај да се откаже од вакво дејствување. Од полицијата пак побара да го почитува законот бидејќи ќе заврши како полицајата на Мубарак“,
пренесува „Балкан веб“.
Градоначалникот на Тирана, Ерион Велиај за „Њуз 24“ изјави дека ФРД не го почитува законот и дека пред 10 дена општината им испратила писмо да ги ослободат просториите, за што рокот изминувал денес.
„Испративме писма до партиите да ги ослободат просториите. Другите партии ја почитуваа одлуката, додека ФРД денес покажува сила, заедно со Мета, чие присуство не можам да си го објаснам. Моја обврска е да го заштитам имотот на општината. Кога сите други партии сместени во овој објект го испочитуваа нашето барање и оваа партија мора го стори истото“,
рече Велиај, додавајќи дека просторите се во сопственост на општина Тирана и обвинувајќи дека „денешното однесување на Мета е тешка деградација на институцијата претседател“.