Според информациите, претресите се на локација во близина на МВР, во стан на експремиерот, кој е првоосомичен за купување на атрактивните парцели со партиски пари
По наредба на Обвинителството за гонење организиран криминал и корупција, се вршат претреси во рамки на истрагата за случајот „Плацовите на Водно“.
Од обвинителството велат дека претресите се во насока на прибирање материјални докази, но во моментот не се во можност да споделат детали.
„Денеска е извршен претрес во повеќе објекти. Претресот е во рамки на истражните дејствија во предметот во јавноста познат како ‘Плацеви на Водно’. Основното јавно обвинителство за гонење на организиран криминал и корупција продолжува во континуитет да презема дејствија во насока на целосно расчистување на предметот“,
велат од Обвинителството.
Според информации на „360 степени“ од извори во истрагата, претресите се на локација во близина на МВР, во стан на експремиерот Никола Груевски, кој е првоосомичен за купувањето на атрактивните парцели со партиски пари.
За овој случај, републичкиот обвинител Љубомир Јовески во јавните настапи најавуваше дека истрагата ќе се проширува и на други недвижности, но до овој момент ниту од прес-службата на обвинителството ниту од шефицата на Основното јавно обвинителство за гонење организиран криминал и корупција, Вилма Русковска, нема официјална потврда дека денешните претреси се во врска со новокториен имот на Груевски.
Во случајов осомничен е и бизнисменот Орце Камчев (четвртоосомничен), на кој пред десетина дена токму во рамки на овој предмет од Основниот кривичен суд во Скопје му беше одреден притвор од 30 дена по барање на обвинителството, откако Агенцијата за национална безбедност (АНБ) издаде белешка дека подготвувал бегство.
Второосомничен е Сашо Мијалков, а третоосомничен е кумот на Груевски, Ристо Новачевски.
Истрагата за случајот беше отворена на 19 октовмри лани, а според неофицијални информации таа е во завршна фаза и се наоѓа пред обвинение.
Порталот „СДК.мк“, пак, објави дека се откриени три нови станови на Груевски во зградата на Бихаќка, каде што тој живееш до бегството во Будимпешта, а кои се воделе на име на мајка му и на секретарката.
Според соопштението издадено при отворање на истагата, Груевски, како првоосомничен, се сомничи дека во периодот од 2006 до 2012 противправно си присвоил пари од донации за ВМРО-ДПМНЕ, а потоа од октовмри 2012 до септември 2013 ги пуштал во оптек преку фирма-ќерка на офшор фирма од Белизе и така ги купил атрактивните плацеви на Водно. Станува збор за земјиште од 11 000 квадратни метри и сума од 1,3 милиони евра.
„Второосомничениот, иако знаел дека паричните средства се прибавени со кривично дело, стапил во контакт со сопственик на веќе регистрирана офшор фирма во Белизе и побарал документацијата, печатите и жиросметката да му бидат дадени на располагање. Во јули 2012 година била основана фирма – ќерка во Скопје на која, по претходен договор со првоосомничениот, станал управител третоосомничениот. На сметката на правното лице во повеќе наврати биле пуштени во оптек средствата прибавени со кривично дело. По постигнување на согласност за купопродажната цена, третоосомничениот во својство на управител на правното лице извршил плаќање кон сопствениците на земјиштето, со што бил прикриен изворот на парите и вистинскиот сопственик на земјиштето со вкупна површина од 11 000 квадратни метри“,
наведе Обвинителството при отворање на истрагата.
Кога во јавноста почнаа да се објавуваат „бомби“ со кои се открива сопственоста на парцелите на Водно, за да се прикрие вистинскиот сопственик, обвинителството тврди дека Новачевски како управител на фирмата-ќерка ја пренел сопственоста на друга фирма.
„Тој, по претходен договор со првооосомничениот, користејќи полномошно издадено од сопственикот на правното лице од Белизе ја пренел сопственоста на правното лице чиј управител е петоосомничениот, а шестоосомниченото лице се јавува како краен сопственик на правното лице. За да се прикрие локацијата, движењето и сопственоста на имотот ‘новите сопственици’ донеле одлука за преименување на правното лице и одлука за физичка делба на парцелата од 6 785 квадратни метри на три нови парцели. За да ја прикријат локацијата и сопственоста плацовите биле пренесени на физичко лице без платен удел, но со определен рок од 3 години за исплата на купопродажната цена“,
наведоа од обвинителството.