Препораките за превенција од коронавирусот за ограничување на јавните настани и собири продолжуваат до 13 март, информира Владата откако го прифати предлогот на Комисијата за заразни болести. Дотогаш и спортските натпревари ќе се одржуваат без публика.
Препораките остануваат на ниво на апел бидејќи, како што претходно изјави министерот за здравство Венко Филипче, нема локална трансмисија на коронавирусот, па нема потреба од поригорозни мерки и забрани.
На владината седница биле дадени насоки до Институтот за јавно здравје за редовно да ја ажурира листата со ризични земји во кои е регистриран коронавирусот и да ги информира гранични служби и полицијата. Надлежни гранични служби се задолжени редовно да доставуваат податоци за сите патници што влегуваат во земјата организирано и да прават листа со податоци за патниците кои се превезуваат со редовните линии.
Останува и препораката на Владата за сите патници што доаѓаат во Македонија од регионите каде што е регистриран коронавирусот да го пријавуваат влегувањето во земјата и да ги известат здравствените и безбедносните власти на граничните премини доколку се сомневаат дека имаат симптоми.
Поврзани вести:
Филипче: Автобус со туристи доаѓа од Романија, ќе се проверуваат на граница (ВИДЕО)