Откако „ги спасија“ платите за април и за мај на судиите и на сите функционери, од Здружението им препорачуваат на колегите да бидат солидарни и, на доброволна основа, да донираат средства во фондот за справување со ковид-19
Најмалку 20 проценти да издвојат судиите од своите плати за април и мај и да ги донираат во солидарниот фонд за справување со ковид-19, препорачува управниот одбор на Здружението на судии.
*Поврзана вест: Наместо минималец, на уставните судии ќе им останат платите од над 90 илјади денари
Оваа препорака на управниот одбор може да се спроведува на индивидуална и на доброволна основа.
Тие се задоволни што Уставниот суд донел решение за поведување постапка за оценување на уставноста и законитоста на донесената владина уредба, со која беше предвидено државните функционери, судиите и обвинителите да добиваат минимална плата од 14 500 денари месечно за април и мај.
„Тргнувајќи од ова Решение на Уставниот суд, а по повод поднесената иницијатива, управниот одбор на Здружението на судиите очекува и во натамошниот тек на постапката да преовладуваат правните аргументи, со што ќе се почитува владеењето на правото и правната држава“,
се вели во соопштението на управниот одбор на Здружението на судиите.
Во дописот се вели дека управниот одбор на Здружението на судии ја прифаќа сериозноста на состојбата во која се наоѓа земјава по објавената вонредна состојба предизвикана од пандемија на вирусот ковид-19.
„Во целост ги поддржуваме активностите на Владата и другите релевантни институции, во насока на изнаоѓање креативни и функционални решенија за ублажувања на последиците од ваквата состојба, притоа изразувајќи особена почит и благодарност кон здравствените работници, за нивната пожртвуваност и секојдневно ризикување на нивните животи, за нас и нашите семејства односно сограѓани“,
се вели во соопштението.
*поврзана вест: Здружението на судии бара Владата да ја смени Уредбата за платите и судиите доброволно да се солидаризираат