Според неговата изјава дадена за дел од медиумите во земјава, Михаилова на Клиниката за неврологија во Скопје се јавила еден и пол месец по сообраќајната несреќа за која е обвинета и таму била задржана три дена. Барбов кај неа констатирал скршеница на пршлен што ѝ предизвикува проблеми во движењето, а методот на лекување што ѝ го препорачал најблиску го имало во Бугарија. Дополнително, појаснува тој, Михаилова немала здравствено осигурување во Македонија, додека бугарското државјанство што го поседувала истовремено ѝ ги покривало здравствените трошоци за лекување
На барање на директорот на Клиниката за неврологија во Скопје, инспектори на Државниот санитарен и здравствен инспекторат вршат проверки на здравственото досие на Михаилова од нејзиното лекување во земјава
Докторот на Универзитетската клиника за неврологија Иван Барбов, кај кого се лекувала Ива Михаилова, во изјава за медиумите вели оти не знаел дека против неа се води постапка за сообраќајка со смртни последици и дека препораката што ја дал да се лекува во Бугарија била поради тоа што таа имала бугарско државјанство и здравствено осигурување во земјата.
Дополнително, како што вели тој во изјава за Канал 5, најблиска држава чие здравство располага со методите на лекување што тој ги препорачал била Бугарија.
Инаку, медицинскиот извештај што го изготвил неврологот доктор Барбов се најде во фокусот откако беше објавен документ со негов факсимил од системот „Мој термин“ во кој препорачал лекување на Ива Михаилова во странство.
Барбов за препораката и лекувањето на Михаилова на Клиниката за неврологија
Според неговата изјава, Михаилова на Клиниката за неврологија во Скопје се јавила еден и пол месец по сообраќајната несреќа за која е обвинета и таму била задржана три дена. Барбов кај неа констатирал скршеница на пршлен што ѝ предизвикува проблеми во движењето, а методот на лекување што ѝ го препорачал најблиску го имало во Бугарија. Дополнително, појаснува тој, Михаилова немала здравствено осигурување во Македонија, додека бугарското државјанство што го поседувала истовремено ѝ ги покривало здравствените трошоци за лекување.
„Препораката за лекување во Бугарија беше најмногу затоа што таа е бугарски државјанин и има бугарско здравствено осигурување. Во таа смисла беше препораката. Во тоа време јас не знаев (за сообраќајката н.з), за тоа има институции кои треба нели да се грижат. И јас наведов некои методи на лекување кои таму може да ѝ помогнат“,
вели докторот.
Во изјава за „Слободен печат“, Барбов вели дека и да знаел за сообраќајката тој бил должен да помогне бидејќи тоа е негова обврска како лекар.
„После таа хоспитализација, таа дојде неколкупати на преглед кај мене и јас третманите што ги предложив да бидат направени во странство, односно да бидат направени во Бугарија, беа поради тоа што таа имаше бугарско државјанство и логично беше таму да ги направи тие прегледи и во тој правец беа дадени моите насоки за понатамошно лекување. Тука мојата обврска како лекар завршува“,
вели докторот и во изјава за „Слободен печат“.
Барбов додава дека прегледите биле плаќани преку конвенцијата меѓу Македонија и Бугарија, а изборот каде ќе се лекува е и право на пациентот. Тој сметал и оти нема основа да се бара конзилијарно мислење од Клиниката, кое потоа би било доставено до Фондот за здравствено осигурување за одобрување лекување во странство. Докторот посочува дека тој не ја пратил Михаилова да се лекува во Бугарија, туку тоа било само препорака, а не единствена опција.
Здравствени инспектори вршат проверки на Клиниката за неврологија
Дека не бил одржан стручен колегиум на кој би било донесено конзилијарно мислење за лекување во странство денеска потврди и директорот на Клиниката за неврологија, Јован Божиновски, кој во изјава за медиумите наведе дека објаснувањето на докторот било дека чекал резултат од магнетна резонанца направена во приватна болница.
Божиновски побарал инспектори од Државниот санитарен и здравствен инспекторат да извршат проверки во протоколите на лекување на Михаилова на Клиниката за неврологија. Како што објави телевизија Телма, искази пред инспекторите дале Божиновски и докторот Барбов.
На медицинскиот извештај на доктор Барбов денеска се осврна и владејачката ВМРО-ДПМНЕ, од каде побараа по допрен глас да се истражи дали зад бегството на Ива Михаилова во Бугарија стојат актуелниот и поранешниот лидер на СДСМ, Венко Филипчеи Зоран Заев, бидејќи Барбов бил директор на Клиниката за неврологија за време на власта на социјалдемократите.
Министерот за здравство Сашо Клековски, пак, изјави дека бегството на Михаилова во Бугарија се случило пред доаѓањето на бугарскиот лекарски конзилиум во Македонија. Според него, проверките од странските и домашните лекари брзо ќе покажеле дека не постојат медицински причини за нејзиното лекување во странство.
„Бегството е поради доаѓањето на бугарскиот конзилиум тука. Тој требаше заедно со македонските лекари да ги провери наводите на лицето. Мислам дека тогаш работите ќе излезеа на виделина какви што се. Јас патувам (следната недела н.з.) во Софија и ќе разговарам со нивното Министерство, бидејќи во основа таму нема здравствен случај“,
изјави Клековски при денешната посета на Клиничката болница во Штип.
Михаилова е во болницата „Пирогов“ во Софија
И додека здравствените власти го проверуваат нејзиното мецинско досие во земјава, Ива Михаилова е на лекувањето во Клиниката „Пирогов“ во Бугарија. Оттаму за Канал 5 потврдиле дека таа е хоспитализирана во болницата и дека во моментот кај неа се вршат дополнителни дијагностички испитувања и добива терапија. Каква дијагноза е утврдена не откриваат.
„За тоа колку долго ќе трае, одлучуваат и ќе проценат лекарите. Таа дојде како пациент, имаше одредени тегоби и во такви случаи пациентите се примаат на болничко лекување, односно се хоспитализираат во болница. Така што, не знам што точно да ви одговорам. Не знам како кај вас е уреден здравствениот систем, но кај нас кога некој има здравствен проблем оди на лекар и лекарот одлучува што е потребно да се преземе за неговата здравствена состојба“,
вели портпаролката на болницата „Пирогов“ во Софија, Марија Појразова.
Ива Михаилова е во Бугарија од понеделникот, а во изјава за бугарскиот медиум БТВ таа рече дека одлуката да замине е поради влошената здравствена состојба во која се наоѓа.
Против жителката на Кочани со македонско и бугарско државјанство, се води судска постапка за сообраќајна несреќа со смртни последици. Во текот на процесот, таа тврдеше дека е жртва на дискриминација поради тоа што има двојно македонско и бугарско државјанство и дека не ѝ се дозволува заминување на лекување во Бугарија.
Основниот суд во Кочани вчера ѝ одреди 30-дневен притвор на Михаилова, одлука која е донесена по предлог на кочанското основно јавно обвинителство, по што беше распишана централна и меѓународна потерница по неа.
Бугарското Министерство за внатрешни работи денеска соопшти дека не презеле мерки за утврдување каде се наоѓа Михаилова на територијата на земјата и дека таа не може да биде вратена во Македонија поради уставните одредби на земјата што го регулираат екстрадирањето бугарски државјани во друга земја поради кривично гонење.