Преку платформата за онлајн-настава и со физичко присуство на тимови од МОН, Бирото за развој и Државниот просветен инспекторат ќе се следи квалитетот на наставата, присуството на наставниците на своите работни места и дали одржуваат онлајн-настава.
Вака министерката за образование Мила Царовска одговори на новинарско прашање, дали имаат механизам да контролираат дали ќе се спроведува онлајн-наставата, бидејќи според некои претходни искуства имало наставници кои не ја одржувале.
Царовска рече дека клучно во овој начин на настава е наставниците да бидат партнери со кои таа најави чести средби.
Контролата, како што рече, пред сѐ ќе биде мотивациска, а потоа и со физичко присуство на претставници од Државниот просветен инспекторат и советниците во Министерството за образование.
„Единствената национална платформа за учење на далечина ни нуди можност да се гледа кој е приклучен, во колкав временски период, таа алатка ни ја нуди таа можност. Но секако и со физичко присуство на тимови од МОН, Бирото за развој и Државниот просветен инспекторат ќе се следи квалитетот на наставата и присуството на наставниците. Во овој план што денеска Владата го усвои се вели дека се води евиденција за учество на учениците во е – дневник и онлајн и за физичко присуство, а исто така се води евиденција за присуството на наставниците на своето работно место“,
рече Царовска.